Qaraǵandy oblysyndaǵy shahtada oryn alǵan jazataıym oqıǵanyń sebepterin arnaıy komıssııa tekseredi

ASTANA. QazAqparat - Qaraǵandy oblysynda 5 adamnyń ómirin qıǵan shahtadaǵy órt oqıǵasyn arnaıy tergeý úshin Eńbek jáne halyqty áleýmettik qorǵaý mınıstrligi komıssııa qurdy, dep habarlaıdy QazAqparat.

Komıssııany Tótenshe jaǵdaılar mınıstrligi Ónerkásiptik qaýipsizdik komıteti tóraǵasynyń orynbasary Musa Tanabaev basqarady. Komıssııanyń quramyna Qaraǵandy oblysy ákiminiń birinshi orynbasary Vadım Basın, TJM ónerkásiptik qaýipsizdik komıtetiniń Qaraǵandy oblysy boıynsha departamenti basshysynyń orynbasary Arman Abylqasymov, Qaraǵandy oblysy eńbek ınspektsııasy jónindegi basqarmasy basshysynyń orynbasary Saıash Ahmetov, Qaraǵandy oblysy Densaýlyq saqtaý basqarmasy basshysynyń orynbasary Qanat Abzalıev, Qaraǵandy oblysy jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Tóleý Muhtar jáne basqalar kirdi.

2023 jyldyń 17 tamyzynda saǵat 10.05-te Qaraǵandy oblysy Shahtınsk qalasynda, «ArselorMıttal Temirtaý» AQ Kómir departamentiniń «Qazaqstan» shahtasynda D6 kómir eńisin (gorızont – 170 m) qazý kezinde konveıer lentasy janyp, apatty joıý jospary engizildi.

Shahtada barlyǵy 227 adam boldy, 17 tamyzda 222 jumysker jer betine shyǵaryldy.

Qutqarý operatsııasynyń qorytyndysy boıynsha 17-19 tamyz aralyǵynda 5 adamnyń denesi tabyldy:

- Slıýnkov Vıtalıı Vladımırovıch 05.03.1965 jyly týǵan, 17.08.2023j.;

- Býrgýn Vıktor Sergeevıch 12.09.1966 jyly týǵan, 18.08.2023j.;

- Steshın Denıs Gennadevıch 13.08.1978 jyly týǵan, 18.08.2023 j.;

- Halıkov Artýr Rınatovıch, 1994 jyly týǵan, 19.08.2023 j.;

- Starovoıt Ilıa Aleksandrovıch, 1996 jyly týǵan, 19.08.2023j. tabyldy.

Aýrýhanada 11 adam emdelýde.

Apattyq shahtadaǵy órt saldaryn tolyq joıý boıynsha jumystar jalǵasýda.

Qaza tapqandardyń otbasylaryna tıisti kómek kórsetý máseleleri baqylaýǵa alyndy.

Eske salsaq, Qaraǵandy oblysyndaǵy «Qazaqstan» shahtasynda órt 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

Shahtanyń astynda qalyp qoıǵan besinshi kenshiniń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.

Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.

Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.