Qaraǵandy oblysyndaǵy shahta apatynyń saldaryn joıý jumystary jalǵasýda
QARAǴANDY. QazAqparat - Qaraǵandy oblysy «ArselorMıttal Temirtaý» AQ kómir departamentiniń Lenın atyndaǵy shahta apatynyń saldaryn joıý jumystary jalǵasýda, dep habarlaıdy QazAqparat tilshisi taý-ken qutqarý qyzmetine silteme jasap.
«Lenın atyndaǵy shahtanyń 4.02D6-1-V lavasyndaǵy órt saldaryn joıý jumystary jalǵasyp jatyr. Ázirge «KÁAQQ» RMM fılıalynyń jedel bólimsheleri izdeý, aýmaqty sýmen jáne aýa-mehanıkalyq kóbikpen salqyndatý, apatty aýmaqtaǵy aýa quramyn baqylaý, azot qondyrǵylary arqyly uńǵymamen azot jberý, apatty qutqarý jumystaryn júrgizýge mashyqtanǵan shahta ujymymen birge apat aýmaǵyna laılanǵan qoımaljyń shashý boıynsha daıyndyq júrgizý, aýmaqty oqshaýlaý sekildi jumystar atqaryldy», - delingen habarlamada.
Taý-ken qutqarýshylarynyń aıtýynsha, aýmaqtaǵy gaz quramy jáne temperatýra belgilengen qalyptan aspaıdy, tútin de joq.
Órt sebepteri apat saldary joıylǵan soń anyqtalady.
Taý-ken qutqarý qyzmetiniń málimetteri boıynsha, ózdiginen kómir janyp ketken lava jer betinen 620 metr tereńdikte jatyr. Ashyq órtti shahta jumysshylary kórgen. Olar órtti óz betinshe óshire almaǵan. Shahtanyń taý-ken dıspetcheri apat saldaryn joıý josparyn iske qosty.
9 jeltoqsan kúni 23.44-te «Kásibı áskerılendirilgen avarııalyq-qutqarý qyzmeti» RMM Qaraǵandy fılıalynyń bólimshesi shaqyryldy. Oqıǵa ornyna 11 mınýttan keıin kelgen qutqarýshylar órtti taratpaýǵa jáne sóndirýge kiristi. Lavadaǵy órtti tolyq sóndirý úshin shamamen bir táýlik ketti.
Lenın atyndaǵy shahtada eki lava bar. Ázirge onyń bireýi ǵana jumys istep tur. Ekinshi lava apat saldary tolyq joıylǵan soń iske qosylady.
Eske sala ketsek, 9 jeltoqsan kúni túngi on eki shamasynda Qaraǵandy oblysynda «ArselorMıttal Temirtaý» AQ kómir departamenti Lenın atyndaǵy shahtanyń 4.02D6-1-V lavasynda kómir ózdiginen janyp ketti.
Kompanııa aqparatyna sáıkes, apat kezinde shahtada 178 adam bolǵan. Zardap shekkender joq. Jer astynda jumys istegen shahta jumysshylary qutqarýshylar jetkenshe, óz kúshterimen syrtqa shyqty.
«ArselorMıttal Temirtaý» AQ «ArselorMıttal» kompanııasynyń quramyna kiredi jáne QR taý-metallýrgııalyq sektorynyń iri kásiporny bolyp tabylady. «ArselorMıttal Temirtaý» AQ quramyna Temirtaýdaǵy metallýrgııalyq kombınat, 8 kómir shahtasy, Qaraǵandy, Aqmola, Qostanaı oblystaryndaǵy jez kenin óndiretin 4 ken orny kiredi.
