Qaraǵandy oblysyndaǵy Sátbaev qalasynyń ákimi taǵaıyndaldy

QARAǴANDY. 19 naýryz. QazAqparat - Qaraǵandy oblysyna qarasty Sátbaev qalasynyń ákimi qyzmetine buǵan deıin oblys ákimi apparatynyń basshysy bolǵan 37 jastaǵy Ashat Ydyrysov taǵaıyndaldy, dep habarlady óńir ákiminiń baspasóz qyzmeti.

«Oblys ákimi Baýyrjan Ábdishevtiń ókimimen QR Prezıdenti Ákimshiliginiń jáne qalalyq máslıhattyń kelisimi boıynsha Sátbaev qalasynyń ákimi qyzmetine A. Ydyrysov taǵaıyndaldy», - delingen habarlamada.

Oblys ákiminiń baspasóz qyzmetinen habarlanǵandaı, Sátbaev qalasynyń burynǵy ákimi Batyrlan Ahmetov basqa jumys ornyna aýysýyna baılanysty qyzmetinen bosatyldy.

A. Ydyrysov 1975 jyly dúnıege keldi. Eki joǵary bilimi bar. O.A. Baıqońyrov atyndaǵy Jezqazǵan ýnıversıtetin jáne Q.I.Sátbaev atyndaǵy Qazaq ulttyq tehnıkalyq ýnıversıtetin támamdady. Mamandyqtary - ınjener-elektrmehanık, ekonomıst. Ekonomıka ǵylymdarynyń kandıdaty. 1999 jyldan bastap memlekettik qyzmette jumys jasap keledi. Ortalyq memlekettik organdarda jumys ótili bar.

2012 jyldyń qazan aıynan bastap A. Ydyrysov Qaraǵandy oblysy ákimi apparatynyń basshysy bolǵan.