Qaraǵandy oblysyndaǵy ózender basseıninde qar jamylǵysy jyldaǵydan tómen – TJD
QARAǴANDY. QazAqparat – Qaraǵandy oblysynyń TJD «Qazgıdromet» fılıalymen birlesip Nura jáne Sherýbaı-Nura ózenderiniń joǵarǵy aǵysynda qardy qaıta ólshep jatyr. Bul sharalar kóktemgi sý tasqynynyń aldyn alý maqsatynda júrgizilýde, dep habarlaıdy QazAqparat tilshisi.
Qar ólsheý marshrýtynyń alǵashqy kezeńi qańtar aıynda uıymdastyrylǵan. Onyń qorytyndysy boıynsha Nura ózeniniń basseıninde ylǵal qory normadan 23%-ǵa, Sherýbaı-Nura 23%-ǵa, Keńgir 49%-ǵa, Sarysý 14%-ǵa, Toqyraý 38%-ǵa tómen ekeni anyqtaldy.
Nura ózeniniń basseıninde topyraqtyń qatý tereńdigi 63-ten 150 sm-ge deıin jetken.
«2021 jylǵy sý tasqyny kezeńine daıyndyq 2020 jyldyń jazynda bastaldy. Qaraǵandy oblysynyń 33 eldi mekeniniń aýmaǵynda 22 shaqyrymnan astam qorǵaý bógetteri men jal turǵyzyldy jáne nyǵaıtyldy, ózen arnalarynyń sý tasqyny qaýpi bar ýchaskelerinde 12 shaqyrym aýmaq tereńdetildi, jaǵalaýdy nyǵaıtyldy, arna tazalanyp, keńeıtildi, 9 shaqyrym sý burý arnalary salyndy jáne jóndeldi, 65,5 shaqyrym drenaj jáne sý burý júıeleri tazartyldy, 74 ýchaskeniń sý ótkizý qabileti joǵarylatyldy», - dep málimdedi Qaraǵandy oblystyq TJD baspasóz qyzmeti.
2015-2020 jyldar aralyǵynda oblysta barlyǵy 220 shaqyrymy qorǵanys bógenderi men jal turǵyzylyp, nyǵaıtyldy, 173 eldi mekende 76 shaqyrym ózen jaǵalaýy nyǵaıtylyp, túbin tereńdetilip, arnasy keńeıtildi.
2021 jyldyń qańtar aıynan bastap Samarqand jáne Yntymaq qoımalarynan sanıtarlyq sý aǵyzý jumysy júrgizilip keledi. Búgingi tańda aǵyzylatyn sýdyń kólemi 5 jáne 8 tekshe m/sek jetti.
Aımaqtyń sý tasqyny qaýipti ýchaskelerinde áýeden baqylaý júrgizilip jatyr.
2021 jyly oblystyń halqyn, aýmaǵyn jáne sharýashylyq júrgizýshi sýbektilerin tasqyn sýdan qorǵaý jónindegi is-sharalar jospary ázirlendi. Josparda uıymdastyrýshylyq jáne praktıkalyq sharalardyń barlyq kesheni qarastyrylǵan.
