Qaraǵandy oblysyndaǵy Osakarov aýdanynyń ataýy ózgertiledi

NUR-SULTAN. QazAqparat – Búgin Úkimet janyndaǵy respýblıkalyq onomastıka komıssııasy Qaraǵandy oblysynyń Osakarov aýdany ataýyn ózgertýge baılanysty sheshim qabyldady, dep habarlaıdy QazAqparat mádenıet jáne sport mınıstrliginiń baspasóz qyzmetine silteme jasap.

«Qaraǵandy oblysynyń Osakarov aýdanynyń ataýy ózgertiledi. Jergilikti turǵyndar jıyrma jyl boıy «Sarybel» tarıhı ataýyn qaıtarý máselesin kóterip kelgen bolatyn. Búgin QR Úkimeti janyndaǵy respýblıkalyq onomastıka komıssııasy osy máselege baılanysty biraýyzdan oń sheshim qabyldady. Sonymen qatar, Shymkent qalasy ákimdiginiń jańa aýdanǵa «Turan» ataýyn berý týraly usynysy da qoldaý tapty», - delingen baspasóz málimdemesinde.

Sondaı-aq, komıssııa músheleri memlekettik menshiktegi birqatar obektige ataý berý jáne qaıta ataý týraly usynys boıynsha oń qorytyndy shyǵarǵan.

«Qoǵamda onomastıka máseleleriniń áleýmettik mańyzy zor. Barlyq usynystar saraptamalyq jáne ǵylymı orta ókilderiniń, sondaı-aq jergilikti turǵyndardyń qatysýymen qaralady. Sońǵy ýaqytta komıssııa birinshi kezekte azamattardyń pikirin eskerip, birqatar mańyzdy sheshimder qabyldady», - deıdi mádenıet jáne sport mınıstri Dáýren Abaev.