Qaraǵandy oblysyndaǵy mektepterde ınklıýzııa qoldaıtyn kabınetterdiń sany artty
QARAǴANDY. QazAqparat – Ótken oqý jylynda Qaraǵandy oblysynda erekshe balalarǵa qajetti jaǵdaı jasaǵan mektepter sany 343-ten 370-ke deıin ósti. Inklıýzıvti bilim berýmen qamtý 73%, dep habarlaıdy QazAqparat tilshisi.
Bul týraly Tamyz keńesinde onlaın rejıminde Qaraǵandy oblysynyń bilim basqarmasynyń basshysy Gúlsim Qojahmetova aıtyp berdi.
«Psıhologııalyq-pedagogıkalyq súıemeldeý qyzmetine pedagog-assıstentterdiń 59 shtaty engizildi. Aýtıstik spektrdiń jáne mentaldyq, minez-qulyqtyq aýytqýlary bar balalardyń sany únemi ósip kele jatqanyn eskere otyryp, sońǵy eki jylda oblystyń segiz mektebinde ınklıýzııany qoldaý kabınetteri ashyldy, onyń tórteýi – «Bolashaq» qaıyrymdylyq qorymen birlesip iske qosyldy. Inklıýzıvti tájirıbe boıynsha oqytýdan ótken pedagogtardyń úlesi 32-den 60%-ǵa ósti», – dep habarlady Gúlsim Qojahmetova.
Bıyl memlekettik áleýmettik tapsyrys aıasynda 207 pedagog qoldanbaly minez-qulyq taldaýy boıynsha oqýdan ótedi. Bul qosymsha 500-den astam balany bilim berý qyzmetterimen qamtýǵa múmkindik beredi.
Sondaı-aq qyrkúıek aıynan bastap Temirtaýda 60 oryndyq ońaltý ortalyǵy óz jumysyn bastaıdy. Jyl sońyna deıin oblys ortalyǵynda taǵy bir psıhologııalyq-medıtsınalyq-pedagogıkalyq keńes jáne Qaraǵandy men Sátbaev qalalarynda eki túzetý kabınetin ashý josparlanýda.
«Aldaǵy jyly Shahtınsk qalasynda PMPK jáne Qaraǵandyda «Asyl mıras» qaıyrymdylyq qorymen aýtızmi bar balalarǵa arnalǵan ońaltý ortalyǵyn ashýdy josparlap otyrmyz. Osy jyly jumys istep turǵan arnaıy uıymdar mamandarynyń shtaty 50 adamǵa ulǵaıtyldy. Bul myńnan astam balany ońaltý kómegimen qosymsha qamtýǵa múmkindik beredi», – dedi Gúlsim Qojahmetova.
Sonymen qatar, óńirde «Malahıt» ınteraktıvti platformasy engizilýde, ol arnaıy bilim berý uıymdaryna qujattardy qabyldaý, balalardyń tekserýden ótýi jáne keıinnen ońaltýmen konsýltatıvtik kómek alý rásimderin jeńildetýge múmkindik beredi.
