Qaraǵandy oblysyndaǵy mektep medpýnkteriniń teń jartysy normaǵa saı emes
QARAǴANDY. QazAqparat - Qaraǵandy oblysy ákimdiginde mektep medpýnktterin densaýlyq saqtaý júıesiniń qaraýyna ótkizý úderisi talqylandy, dep habarlaıdy «QazAqparat» HAA tilshisi.
«Oblysta oqýshylar men mektep ujymyna medıtsınalyq qyzmet kórsetý jumysyn, qurylǵylar men medıtsınalyq kabınet ǵımarattaryn densaýlyq saqtaý júıesine ótkizý boıynsha Jol kartasy jasaldy. Menshik nysanyna qaramastan, barlyq mektepter sol aýmaqtaǵy emhanalarǵa bekitilgen», - dep habarlady oblystyq densaýlyq saqtaý basqarmasynyń basshysy Erjan Nurlybaev.
«Inventarızatsııa kórsetkendeı, bilim berý uıymdarynyń 40% medıtsınalyq pýnktteri ǵımarat, tehnıkalyq sharttar, ornalasqan orny sekildi normatıvterge sáıkes kelmeıdi. Sondaı-aq, kabınetterdiń jabdyqtalýy da ruqsat etilgen normanyń 35,8% ǵana quraıdy», - dep atap ótti baıandamashy.
Onyń aıtýynsha, óńirdegi bilim berý júıesinde 8 dáriger men 529 ortasha medıtsınalyq qyzmetker jumys isteıdi. Mekeme basshysy olardyń eshqaısysy jumyssyz qalmaıtynyn basa aıtty.
«Barlyǵyna emhana shtatyna aýysý týraly habar jiberildi. Salystyrý arqyly 10 medıtsınalyq qyzmetkerdiń sertıfıkaty joq ekendigi anyqtaldy. Olar ýaqytsha ózge laýazymdar boıynsha qabyldanady jáne emhana esebinen biliktilikterin kóterip, sertıfıkattalady», - dedi E.Nurlybaev.
Ol bıylǵy oqý jylynda 180 myńnan astam oqýshynyń qaralǵanyn, onyń 8,5 myńynyń túrli aýrýlar boıynsha dıspanserlik esepke qoıylǵanyn habarlady.
Qaraǵandy oblysynda jalpy bilim beretin 513 mektep bar, onyń 507 memlekettik jáne 6 - jeke. Onda 475 medıtsınalyq pýnkt jumys isteıdi. Al 15 balaǵa deıin oqıtyn aýyldyń shaǵyn mektepterinde medıtsınalyq kabınetter múldem joq.
