Qaraǵandy oblysyndaǵy Qyzylqoı ózeni arnasynan asty
QARAǴANDY. QazAqparat - Qaraǵandy oblysynyń Shet aýdanynda sý deńgeıiniń kóterilýine baılanysty Qyzylqoı ózeni arnasynan asyp ketti, dep habarlaıdy QazAqparat Qaraǵandy oblystyq Tótenshe jaǵdaılar departamentine silteme jasap.
Tótenshe jaǵdaılar departamenti taratqan málimetterge qaraǵanda, Qyzylqoı aýylyn sý basý qaýpi bar. Qyzyl sý 9 turǵyn úıdiń aýlasyna kirgen.
Qaraǵandy oblystyq Tótenshe jaǵdaılar departamenti bólimsheleriniń jáne jergilikti atqarýshy organdardyń kúshimen úılerdiń aýlalarynan sýdy sorǵytý jumystary júrgizilýde. Sondaı-aq Qyzylqoı ózeniniń arnasy bekitildi. Ol úshin qum salynǵan 1 500 qap paıdalanylyp, olar 600 metr qashyqtyqqa bıiktigi 40 sm bolatyndaı etip ornalastyryldy. Muzdy qazir qolmen jaryp jatyr.
Oblys ákimi osy elde mekende sý tasqynyna qarsy júrgizilgen sharalardy ózi kelip kórdi. 30 naýryz kúngi saǵat 17-00-degi jaǵdaı boıynsha, sý deńgeıi tómendedi. Sondaı-aq mamandar ózen boıyn taǵy bir márte aralap shyǵyp, turǵyndarǵa sý tasqynyna qarsy jumystar boıynsha qaıtara aqyl-keńes berip shyqty.
