Qaraǵandy oblysyndaǵy kún elektr stansasynyń qurylysyna qarjy bólindi
ASTANA. QazAqparat - Eýropanyń qaıta qurý jáne damý banki Qaraǵandy oblysyndaǵy kún elektro stansasynyń qurylysyn qarjylandyrady.
Búgin QR Prezıdenti janyndaǵy Sheteldik ınvestorlar keńesiniń 31-shi otyrysy aıasynda tıisti kelisimshartqa qol qoıyldy. Qarjylandyrýǵa jasyl klımat qory men taza tehnologııalar qory qatysyp otyr. Zaemnyń jalpy kólemi - 31,1 mln dollar, dep habarlaıdy QazAqparat tilshisi.
Qaryzdyń basym bóligi - 22 mıllıon dollardy bank berse, jasyl klımat qory - 4,2 mıllıon dollar, al jasyl tehnologııalar qory 5,8 mıllıon dollar bólip otyr. Atalǵan uıymdar Qazaqstandaǵy kún elektr stansasynyń qurylysyn alǵash ret qarjylandyrmaqshy. Al joba qurylysy men eksplýatatsııasymen qytaılyq «Risen Energy» kompanııasy aınalysady. Atalǵan kompanııa Qytaıda kún batareıalaryn óndirý salasyndaǵy jetekshi ujymdardyń biri bolyp sanalady. Jańa elektr stansasynyń arqasynda aýaǵa shyǵarylatyn SO2-niń kólemin 55 000 tonnaǵa azaıtýǵa bolady.
QR Energetıka mınıstri Qanat Bozymbaevtyń aıtýynsha, osy saladaǵy áriptestik baılanystar jalǵasa beredi.
«Biz qazirgi jobalarmen shektelmeımiz. Oǵan qosa, bizde halyqaralyq aýktsıondar kezindegi jeńimpazdar anyqtaldy. Olar Qazaqstanda kún jáne jel elektr stansalaryn salatyn bolady. Jasyl energetıkany damytý tujyrymdamasyna sáıkes, 2020 jylǵa deıin balamaly energetıkanyń úlesi 3 protsentke deıin jetýi kerek. Al 2030 jylda atalǵan kórsetkish 10 protsentke kóterilýi shart. Sol sebepti biz Eýropanyń qaıta qurý jáne damý banki sııaqty qarjy ısnstıtýttarymen jumys isteýimiz kerek», - dep atap kórsetti Q.Bozymbaev.
Aıta keteıik, Qaraǵandy oblysyndaǵy kún elektr stansalary úsh jerde ornalasady. Jaqynda bir jobanyń qurylysy Balqash qalasyna jaqyn Gúlshat aýylynda bastaldy. Budan bólek, Aǵadyr men Saran qalasynda taǵy eki stansa salynady.
