Qaraǵandy oblysyndaǵy kásiporyndar qyzmetkerleriniń jalaqysy ósti
QARAǴANDY. QazAqparat - Qaraǵandy oblysy turǵyndarynyń tabystary óskeni týraly óńir basshysy Erlan Qoshanov óziniń esep berý kezdesýi barysynda málimdedi, dep habarlaıdy QazAqparat.
«Elbasynyń jalaqyny kóterý týraly bastamasyn oblystyń 32 myń kásiporyny qoldady. 220 myń qyzmetker orta eseppen burynǵydan 14%-ǵa artyq jalaqy alady. 2018 jyldyń 4 toqsanynyń qorytyndysy boıynsha oblys boıynsha ortasha jalaqy 164 myń teńgege deıin ósti. 1 qańtardan bastap eń tómengi eńbekaqy mólsheri bar aımaqtyń 80 myń turǵynynyń tabysy salyqtyń tómendeýi esebinen 9%-ǵa ósti», - dedi oblys ákimi Erlan Qoshanov.
Onyń aıtýynsha, jumyspen qamtýdyń túrli sharalarynyń arqasynda jumyssyzdyq deńgeıi 4,5% - ǵa deıin tómendegen. Ótken jyly 14 myń jańa jumys orny ashylǵan. Al bıyl 40 myń adamdy jumysqa ornalastyrý josparlanýda.
Erlan Qoshanov sondaı-aq tarıfterdiń tómendeýi jáne baǵany tejeý sharalary týraly aıtyp ótti. 1 qańtardan bastap oblysta kommýnaldyq qyzmetter 5-11%-ǵa arzandady.
«Baǵany ustap turý boıynsha jumys ınflıatsııany 5,1% deńgeıinde ustap qalýǵa múmkindik berdi. Bul respýblıkadaǵy eń úzdik kórsetkishterdiń biri. Turaqtandyrý qory quryldy. Oǵan birinshi qajettilik sanatyna jatatyn azyq-túlik - qant, ósimdik maıy, kúrish, qaraqumyq satyp alyp, saqtalyp qoıdy. Budan basqa, bizdiń fermerler óndiretin jemis, kókónis ónimderi boıynsha toqtalar bolsaq, bıznestiń áleýmettik jaýapkershiligi aıasynda ózindik quny boıynsha 2 000 tonnadan astam ónim salyndy», - dedi oblys ákimi.
Turaqtandyrý qorynyń ónimderi áleýmettik pavılondar men sýpermarketterde naryqtyq baǵadan 25-30% - ǵa tómen baǵamen satyldy. Bıyl kókónis qory 3 000 tonnaǵa deıin artty. Erlan Qoshanov osy bastamany qoldaǵany úshin sharýalarǵa alǵys bildirdi.
