Qaraǵandy oblysyndaǵy qalalarda jumys ornynan berilgen ruqsat qaǵazy jaramsyz bolady
QARAǴANDY. QazAqparat - 2020 jylǵy 18 sáýir saǵat 00.00-den bastap jumys ornynan berilgen anyqtama Qaraǵandy, Abaı, Saran, Temirtaý, Shahtınsk qalasy, sondaı-aq Buqar jyraý aýdanynyń Doskeı, Úshtóbe, Kókpekti, Botaǵara, Ǵ. Mustafın, Petrovka eldi mekenderinde jaramsyz bolady, dep habarlaıdy QazAqparat tilshisi.
Ótkizý júıesi tek elektrondy túrde jumys isteıtin bolady jáne tek karantın kezeńinde jumys isteýge ruqsat etilgen kásiporyndar tizimi jasalady.
«Eger jeke avtokólikpen, velosıpedpen jumysqa barsańyz, jaıaý júrseńiz, qala aýdandary arasyndaǵy jumys boıynsha qozǵalsańyz elektrondyq bazadaǵy tizimde bolýyńyz kerek. Ótinishti tek jumys berýshi ǵana Propusk.kz saıtynda onlaın rejımde ǵana berýi tıis. Atalmysh saıt 2020 jyldyń 17 sáýirinen jumys isteı bastaıdy. Eger kásiporyndardyń qyzmeti qabyldanǵan normalarmen rettelmegen bolsa, jergilikti ákimdikter ótinimdi qabyldamaý quqyǵy bar ekenine nazar aýdaramyz», delingen habarlamada.
Bul shara halyq aǵynyn azaıtýǵa baǵyttalǵan, óıtkeni óńirde karantın rejımin buzý jáne jaramsyz anyqtama berý faktileri tirkelgen. Elektrondyq bazany engizý arqasynda COVID-19-dyń taralýyna jol bermeý sharasy kúsheıtiledi.
«Aıta ketetin mańyzdy jaıt, jumyskerlerge ruqsattama men arnaıy ruqsattar endi berilmeıdi! Tek elektrondyq baza jumys isteıtin bolady. Qosymsha suraqtarǵa jaýapty elektrondy derekter bazasy boıynsha 109 nómirine qońyraý shalyp, alýǵa bolady», delingen habarlamada.
Qaraǵandy oblysynyń basqa qalalary men aýdandarynda elektrondyq bazany engizý kezeń-kezeńmen júzege asyrylady jáne jumys ornynan qaǵaz anyqtamalar áli de jaramdy bolady.
