Qaraǵandy oblysyndaǵy eriktiler alǵashqy eńbekaqysyn aldy

QARAǴANDY. QazAqparat - Qaraǵandy oblysynda eriktiler «Áleýmettik stýdenttik vaýcher» jobasy aıasynda óz eńbegi úshin tólem ala bastady. Alǵashqy bastamashylar qatarynda Qaraǵandy memlekettik ındýstrııalyq ýnıversıtetiniń stýdentteri boldy, dep habarlaıdy QazAqparat tilshisi.

Jobaǵa QMIÝ 40-tan astam stýdenti qatysady. Qańtar aıynda tórt erikti qajetti sharttardy oryndap, 20 myń teńgeden aldy. 2019 jyldyń qarasha aıynan jeltoqsan aıyna deıin jastar «Jeńis» respýblıkalyq qaıyrymdylyq jobasy aıasynda «Áleýmettik stýdenttik vaýcher» baǵdarlamasy boıynsha eńbek etti. Bul jobanyń maqsaty – aǵa býyndy qoldaý, zeınetkerlerdiń bos ýaqytyn uıymdastyrý.

2020 jyl Memleket basshysynyń bastamasy boıynsha Qazaqstanda eriktiler jyly dep jarııalandy. Volonterlik bastamalardy qoldaý úshin «Áleýmettik stýdenttik vaýcher» jobasy iske qosyldy. 20 saǵat ishinde stýdentter 20 myń teńge, 50 saǵat úshin 50 myń teńge kóleminde syıaqy alady.

Volonterlik uıymdardyń ózara is-qımyly, olardyń qyzmetin úılestirý úshin Qazvolunteer.kz biryńǵaı ınternet-platformasy iske qosyldy. Saıtta árbir nıet bildirýshi adam tirkele alady. Atalmysh platformanyń arqasynda eriktiler óz qyzmeti týraly aqparatty ashyq túrde ornalastyrýǵa múmkindik aldy. Jobalar men aktsııalardy uıymdastyrýshylarǵa pikirlester men oryndaýshylardy tabý ońaı boldy. Platformada sondaı-aq volonterlerdiń reıtıngi qalyptastyrylady.

Temirtaýda qalalyq jastar klýby janyndaǵy «Shańyraq» eriktiler uıymy jumys isteıdi. Qozǵalys 200-den astam jastardy biriktirdi. Volonterler balalar úılerine baryp, qarttarǵa kómek kórsetip, áleýmettik aktsııalarǵa qatysady. Adamdar joǵalǵan jaǵdaıda óz izdeý toptaryn uıymdastyryp, polıtsııaǵa kómek kórsetedi.