Qaraǵandy oblysyndaǵy burqasyn: Qar qursaýynda qalǵan kólikterden 9 adam qutqaryldy
QARAǴANDY. QazAqparat – 12 qańtar kúni Qaraǵandy oblysynda aýa raıynyń nasharlaýyna baılanysty barlyq baǵytta kólik qozǵalysy shekteldi. Tótenshe jaǵdaılar departamentiniń bólimsheleri qar qursaýynda qalǵan avtokólikterden 9 adamdy qutqaryp, evakýatsııalady, dep habarlaıdy QazAqparat tilshisi.
Qutqarý operatsııalary Abaı, Buqar Jyraý jáne Osakarov aýdandarynyń avtojoldarynda júrgizildi.
Sonymen qatar, kólikterdiń júrý qıyndyǵyna jáne aýrýhanaǵa jatqyzý qajettiligine baılanysty Buqar Jyraý aýdany Baımyrza aýyly qutqarýshylarynyń kúshimen 2020 jyly týǵan bala Temirtaý aýrýhanasyna jetkizildi.
Tótenshe jaǵdaılar departamenti eldi mekenderden tys jerlerge jáne alys qashyqtyqtarǵa, ásirese túnde jáne aýa raıy nasharlaǵan kezde jolǵa shyǵýdan bas tartýdy suraıdy.
Avtojoldarda qozǵalysqa tyıym salý nemese shekteý týraly aqparatty qadaǵalap otyrýǵa keńes beriledi.
Aýa raıynyń ózgerýi jáne avtojoldardyń jaǵdaıy týraly jedel aqparat Darmen mobıldi qosymshasynda, TJD resmı saıtynda qoljetimdi.
Oqıǵalar men TJ faktileri týraly 112 nemese (8-7212) 43-36-36, 43-37-37-ge habarlaý qajet.
