Qaraǵandy oblysyndaǵy balalardyń jappaı ýlanýyna baılanysty tergeý bastaldy – Bas prokýratýra

ASTANA. QazAqparat – QR Bas prokýratýrasynyń baspasóz qyzmeti Qaraǵandy oblysynda balalardyń jappaı tamaqtan ýlanýyna baılanysty tergeý bastalǵanyn málim etti, dep habarlaıdy QazAqparat.

«31.07.2023 jyly balalardyń tamaqtan ýlaný faktisi boıynsha «Qaraǵandy oblysynyń balalarǵa arnaýly áleýmettik qyzmetter kórsetý ortalyǵy» KMM QR QK-niń 304-babynyń 2-bóligi (aýyr zardaptarǵa ákep soqtyrǵan sanıtarlyq erejelerdi nemese gıgıenalyq normatıvterdi buzý) boıynsha sotqa deıingi tergeý bastaldy.Qylmystyq is Qaraǵandy oblysy prokýratýrasynyń arnaıy prokýrorlarynyń baqylaýyna qabyldandy»,-delingen baspasóz qyzmetiniń málimetterinde.

Sondaı-aq onda tergeýge quqyq qorǵaý jáne arnaıy organdardyń tájirıbeli qyzmetkerleri jumyldyrylyp, vedomstvoaralyq jedel-tergeý toby qurylǵany aıtylǵan.

Tıisti saraptamalar taǵaıyndaldy. Tergeý sheńberinde jaýapty laýazymdy tulǵalardyń is-áreketterine tıisti quqyqtyq baǵa beriletin bolady.

Elimizde jetim balalarǵa, ata-anasynyń qamqorlyǵynsyz qalǵan balalarǵa, sondaı-aq múmkindigi shekteýli balalarǵa arnaýly medıtsınalyq-áleýmettik qyzmet kórsetetin 84 mekeme bar (37 balalarǵa arnaýly medıtsınalyq-áleýmettik qyzmet kórsetý ortalyǵy, 47 balalar úıi, sondaı-aq 2959 balany qamtıtyn otbasyn qoldaý ortalyqtary).

Sonymen qatar, Bas prokýratýra ýákiletti memlekettik organdar men aýmaqtyq prokýrorlarǵa atalǵan mekemelerdi keshendi tekserýdi uıymdastyrýdy tapsyrdy.

Budan buryn habarlanǵandaı, Qaraǵandy oblysynyń balalarǵa arnaýly áleýmettik qyzmet kórsetý ortalyǵynda balalardyń jappaı ýlaný deregi tirkeldi.

Oqıǵa ornyna Densaýlyq saqtaý mınıstri Ajar Ǵınııat attandy.

Keıinirek Densaýlyq saqtaý vıtse-mınıstri Aıjan Esmaǵambetova Úkimette tilshilerdiń saýaldaryna jaýap bere otyryp, balalardyń neden ýlanǵan áli anyqtalmaǵanyn habarlady.