Qaraǵandy oblysyndaǵy aýyldyń aýlalaryn nóser saldarynan sý shaıyp jatyr
Senokosnoe aýylynyń turǵyndary áleýmettik jelilerde eldi mekende qatty nóser saldarynan aýla aýmaqtaryn sý basyp jatqany týraly beıne jarııalady. Aýyl turǵyndary sý astynda avtokólikteri qalǵanyn habarlady. Endi olar óz maldary úshin qaýiptenetinderin aıtyp otyr.
«Osakarov aýdanynyń Senokosnoe aýylyndaǵy aýla aýmaqtaryn sý basý týraly habarlama kelip tústi. Sý tasqyny nóser jańbyrdyń saldarynan boldy. Turǵyndarǵa kómek kórsetý úshin Qaraǵandy oblysynyń TJD kúshteri sý aıdaý tehnıkasymen birge jiberildi.
Oqıǵa ornyna 35 adam, 4 birlik tehnıka, 13 motopompa jiberildi. Aýmaqty aralaý júrgizilýde», - dep habarlady Qaraǵandy oblysy TJD baspasóz qyzmeti.
Sondaı-aq, jergilikti jerge aýdan ákimdiginiń ókilderi de kelip jetti. Aýyl turǵyndaryna keltirilgen materıaldyq shyǵyn týraly keıinirek habarlanady.
