Qaraǵandy oblysyndaǵy apatty úıdi Jańa jylǵa deıin qalpyna keltirýge ýáde berildi
QARAǴANDY. QazAqparat - Qaraǵandy oblysy, Shet aýdanynyń ákimi Marat Jandáýletov Aqjal aýylyndaǵy kópqabatty apattyq úıdi qalpyna keltirý jumystary jaıly aıtty, dep habarlaıdy «QazAqparat» HAA tilshisi.
«Bıýdjette jóndeý jumystaryna aqsha qarastyrylmaǵan. Eń aldymen jertóle qurylymyn nyǵaıtý kerek. Biz Aqjal aýylyndaǵy «Nova - Tsınk» kásipornynyń basshylyǵynan kómek suradyq. Kelisimshart boıynsha oblystyq bıýdjetke jylyna 50 mln. teńge aýdarady. Biz osy qarjylardy apattyq úıdiń qalpyna keltirý jumystaryna jumsaý týraly máseleni kóterdik», - dedi M. Jandaýletov óńirlik Ortalyq kommýnıkatsııalar qyzmetindegi brıfıngte.
Onyń aıtýynsha, bul máseleniń oń sheshimi tabylǵan, alaıda qarajat 2017 jyldyń qańtar aıynda aýdarylady. Merdiger jumystardy qaryzǵa jasaýǵa kelisken. «Ázirge jertóleni qalpyna keltirýdemiz. TJ jarııalanyp, alǵashynda rezervtik qordan 17 mln. teńge bólingen. Barlyq jóndeý jumystaryn merdigerler óz qarjysy esebinen júrgizedi. Qazirgi tańda 6 kireberistiń beseýi jóndelgen, tek bireýi qalyp tur. 25 jeltoqsanǵa deıin jumystardy aıaqtap, Jańa jylda turǵyndarǵa úılerin tapsyramyz», - dep túsindirip ótti aýdan basshysy.
Eske sala keteıik, Shet aýdanynyń Aqjal aýylynda qazan aıynda 300-den astam adam turatyn apattyq jaǵdaıdaǵy úı máselesin tezdetip sheshýdi qolǵa alǵan edi. Sarapshylar bul úıde adamdardyń bolýy qaýipti ekendigin rastaǵan. Sol sebepti TJ jarııalanǵan bolatyn.
