Qaraǵandy oblysyndaǵy ákimdikterde front-keńseler ashylady
QARAǴANDY. QazAqparat - Qaraǵandy oblysynyń ákimi Erlan Qoshanov esep berý kezdesýinde aldaǵy ýaqytta memlekettik qyzmetkerler jumysynda bolatyn ózgerister týraly aıtty, dep habarlaıdy QazAqparat.
«Biz azamattarymyz úshin kezekti tosqaýyl emes, alǵashqy kómekshiler bolýǵa umtylamyz. Barlyq ákimdikterde, bylaısha aıtqanda, front-keńseler qurýdy sheshtik», - dedi Erlan Qoshanov.
Onyń aıtýynsha, bul ashyq ákimdikter qaǵıdaty. Barlyq memlekettik qyzmetter men keńes berýler bir tereze qaǵıdaty boıynsha kórsetiletin bolady. Ol turǵyn úıge kezekke turý, jer telimderin alý, járdemaqylar men basqa da barlyq máselelerdi qamtıdy.
Ákim azamattar úshin barlyq qolaıly jaǵdaı jasalatyndyǵyn aıtyp ótti.
«Bizdiń alǵa qoıǵan jáne talpynyp otyrǵan maqsattarymyz bar: ol, mysaly, pandýstary men jasyl jelekteri bar qaýipsiz, jaryq jáne taza jaıaý júrginshiler joldary tóselgen, úıden bir adym qashyqtyqta ornalasqan yńǵaıly balabaqshalar, mektepter men emhanalar; ol jumystan keıin sportpen shuǵyldanýǵa jáne salaýatty ómir saltyn ustanýǵa múmkindik berý. Ol qalanyń nemese aýyldyń kez-kelgen jastary oqýdy jaqsy oqysa, óziniń damyýyna baryn jasasa, óz týǵan jerinde, óz oblysynda tabysqa jetýge múmkindigi bar ekenine senimdi bolýy, turaqty jumyspen qamtamasyz etilýi, damý jáne ósýi úshin teń múmkindiktiń bolýy. Mine, osynyń barlyǵy bolǵanda, biz durys jolda kele jatqanymyzdy túsinetin bolamyz», - dep atap ótti Erlan Qoshanov.
