Qaraǵandy oblysyndaǵy 32 eldi mekende modýldik feldsherlik-akýsherlik pýnkt ashylady
QARAǴANDY. QazAqparat - Bıyl Qaraǵandy oblysynda medıtsına salasynda aýqymdy jobany júzege asyrý josparlanyp otyr. Atap aıtqanda, bul aýyldarǵa qatysty. Modýldik feldsherlik-akýsherlik pýnktter paıda bolatyn 32 eldi meken tańdaldy. Óńir basshysy Jeńis Qasymbek onlaın rejımde ótken halyqpen eseptik kezdesýinde osylaı málim etti, dep habarlaıdy QazAqparat tilshisi.
Jıynda ákim Qaraǵandy oblysyndaǵy densaýlyq saqtaý salasy týraly baıandady.
«Ótken jyly Qarqaraly aýdanynyń Qaraǵaıly kentinde jáne Nura aýdanynyń Shahter aýylynda jańa aýyldyq dárigerlik ambýlatorııalar salyndy. Abaı jáne Shet aýdandarynda ortalyq aýdandyq aýrýhanalar jóndeldi. Osy jyly Aqtoǵaı jáne Nura ortalyq aýdandyq aýrýhanalar da osyndaı ózgeristerdi kútip otyr. Aǵadyr kentine jumys saparym kezinde aqsaqaldar aýrýhana ǵımaratyn jóndeý qajettigine nazar aýdardy. Bıyl mindetti túrde jumysty bastaımyz», - dedi oblys ákimi.
Jeńis Qasymbek onkodıspanserdiń Jezqazǵandaǵy fılıalyn uıymdastyrý máselesin sheshýge ýáde berdi.
Qaraǵandyda eresekterge arnalǵan oblystyq kópbeıindi aýrýhananyń, oblystyq onkologııalyq dıspanserdiń operatsııalyq-reanımatsııalyq korpýsynyń qurylysy bastalady. Sáýlelik dıagnostıka jáne terapııa ortalyǵy úshin ǵımarat salynady. Uzaq ýaqyt kidiristen keıin oblystyq balalar aýrýhanasynyń qurylysyn aıaqtaý qajet.
«Jıhazben jáne qajetti turmystyq tehnıkamen jabdyqtalǵan qyzmettik páterlerdi berý esebinen dárigerler men jas mamandardy tartý máselesin sheshemiz. Eki jyl ishinde 227 dáriger baspanamen qamtyldy. Aldaǵy eki jylda bizdiń oblysqa jumys isteýge kelgen kem degende 300 maman páter alady», - dedi Jeńis Qasymbek.
