Qaraǵandy oblysynda zymyrannyń qulaýy saldarynan kúıip qalǵan er kisi esin jıdy
QARAǴANDY. QazAqparat - Qaraǵandy oblysyndaǵy dalaly jerde qulaǵan «Soıýz-2.1a» zymyran-tasyǵyshtyń bir bóligi qulaǵanda kúıik shalǵan kásiporyn jumysshysy esin jınap, ózi demalyp jatyr, dep habarlaıdy «QazAqparat» HAA tilshisi.
«Ol esin jınady, ózdiginen dem alýda. Qazir ony Maqajanov atyndaǵy travmatologııa jáne ortopedııa ortalyǵyna tasý máselesi sheshilip jatyr. Bul - jaraqattyń osy túri boıynsha mamandandyrylǵan klınıka. Ol jerde kúıik shalǵan naýqastardy emdeý úshin barlyq jaǵdaı jasalǵan», - dep túsindirdi óńirlik densaýlyq saqtaý basqarmasynyń baspasóz hatshysy Aıjan Isa.
Denesiniń 45 protsentin kúıik shalǵan 49 jastaǵy naýqasty sanıtarlyq avıatsııa tikushaǵymen jetkizý josparlanýda.
Talap kentiniń ákimi Ǵabıt Bıtenov habarlaǵandaı, zymyrannyń bir bóligi Reseıdiń jalǵa alǵan jerine qulaǵan.
«Qulaǵan zymyrannyń densaýlyqqa zııan ekeni týraly sózder boldy. Men aýyl turǵyndarymen jeke kezdesip, raketanyń otyny - kerosın ekendigin jáne onyń ekologııa men adam densaýlyǵyna jáne maldarǵa zııany joqtyǵyn túsindirdim», - dedi aýyl ákimi.
