Qaraǵandy oblysynda jylytý maýsymyna daıyndyq qalaı júrip jatyr
«Memleket basshysynyń oblys boıynsha tapsyrmasyna sáıkes jylýmen jabdyqtaý jelilerine tehnıkalyq tekserý júrgizý jónindegi is-sharalar jospary bekitildi. Búgingi tańda tekserý Qaraǵandy, Prıozersk, Saran jáne Abaı qalalarynda júrgizildi. Balqash, Temirtaý jáne Shahtınsk qalalarynda jumys jalǵasyp jatyr. Olardy osy aıdyń sońyna deıin aıaqtaý qajet», – dedi Energetıka jáne turǵyn úı-kommýnaldyq sharýashylyǵy basqarmasynyń basshysy Erbol Tóleýov.
Basqarma basshysy energııa stantsııalary men jylý jelilerindegi jóndeý jumystary týraly baıandady.
Aldaǵy jylytý maýsymyna daıyndyq mamyr aıynda bastaldy. Búgingi tańda stantsııalarda 8 qazandyq pen 6 týrbına jóndeldi. Kestege sáıkes 16 qazandyq pen 9 týrbına jóndelip jatyr.
Sonymen qatar problemalar da bar. Jıynda jumys kestesi buzylǵan energııa kózderi aıtyldy. Bul «ArselorMıttal Temirtaý» AQ JEO-2, Topar GRES. Qaraǵandy, Aqtoǵaı jáne Qarqaraly aýdandarynda qazandyqtar men ASO daıyndaý boıynsha bekitilgen merzimnen qalys qalý tirkelgen.
Yqtımal táýekelder týraly aýmaqtyq Energetıkalyq qadaǵalaý jáne baqylaý departamentiniń basshysy Ernar Hasenov aıtyp berdi.
Jylý jelilerin jóndeý boıynsha qalalar men aýdandardyń ákimderi esep berdi.
Bıyl Temirtaýda alty joba iske asyrylýda, 30 shaqyrymnan astam jylý magıstralinde jóndeý jumystary júrgizilip jatyr. Qala ákimi Oraz Táýirbekov josparlanǵan jumystar merziminde oryndalatynyna sendirdi.
«Ótken jylytý maýsymy problemalardy kórsetip berdi. Munyń bárin aldaǵy qysqa daıyndyq kezinde eskerý qajet. Tirshilikti qamtamasyz etý obektileri men turǵyn úı qoryn daıyndaý jónindegi jumystardy oryndaýda irkilisterge jol bermeý kerektigin kórsetti. Energetıkalyq qadaǵalaý departamenti, Energetıka basqarmasy jóndeý naýqanyn baqylaýdy jalǵastyrsyn», – dep atap ótti oblys ákimi Ermaǵanbet Bólekpaev.
Sondaı-aq óńir basshysy jeke sektor turǵyndary kómir qoryn aldyn ala jasap alýy úshin aqparattandyrý jumystaryna nazar aýdarý kerektigin tilge tıek etti.
