Qaraǵandy oblysynda jylytý maýsymyna daıyndyq aıaqtalýǵa jaqyn
QARAǴANDY. QazAqparat - Qaraǵandy oblysynyń ákimi Erlan Qoshanovqa aldaǵy jylytý maýsymy týraly esep berildi. Keıbir aýdandardaǵy jaǵdaıdy ol erekshe baqylaýǵa alýdy tapsyrdy, dep habarlaıdy Qaraǵandy oblysy ákimdiginiń baspasóz qyzmeti.
Qaraǵandyda jylytý maýsymyna daıyndyq jumystary 95% oryndaldy. 25-shi qyrkúıekke deıin jylytý jelilerin qalypqa keltirý jumystaryn aıaqtaý josparlanyp otyr. Jalpy aımaqta 20-shy qyrkúıekte barlyq nysandar jylý berýge daıyn bolýy tıis.
Erlan Qoshanovqa sondaı-aq halyqqa arnalǵan mektep, aýrýhana jáne áleýmettik-mádenı nysandarǵa arnalǵan kómir qoryna qatysty jaǵdaı týraly baıandaldy.
«Aımaǵymyzda barlyǵy halyqqa arnalǵan kómir satatyn 38 oryn bar. Onyń ishinde Qaraǵandy, Jezqazǵan, Qarajal jáne Shahtınskide qatty otyn qory jaqsy. K-10 jáne K-20 markaly kómirge suranys joǵary bolýyna baılanysty biz dál osy otyn túriniń qoryn ulǵaıtyp jatyrmyz. Qazirgi tańda mundaı kómir tek «Rapıd» JShS-de ǵana emes, sonymen qatar «Bogatyr» ekibastuzdyq razrezinde de satylady. Temirtaý, Balqash, Aqtoǵaı, Buqar Jyraý jáne Jańaarqa aýdandarynda tuıyqtarda kómir qory joq», - dep málimdedi oblys ákiminiń orynbasary Anatolıı Shkarýpa.
Bul aýdandardaǵy jaǵdaıdy aımaq basshysy erekshe baqylaýǵa alýdy tapsyrdy. Al aýdan ákimderine kidirmesten bul olqylyqtardy joıý kerektigin atap aıtty. Jumystardyń nátıjesi kelesi dúısenbide ótetin jınalys barysynda baıandalýy tıis.
Ótken demalys kúnderi oblys ákimi Jańaarqa aýdany men Jezqazǵan qalasynda bolyp qaıtty. Onda ol jylytý maýsymyna daıyndyq jumystarynyń barysymen tanysty.
Oblys halqynyń qatty otynǵa suranysy, aldyn ala esep boıynsha, bıylǵy jyly 745 myń tonnany quraıdy.
Búgingi tańda aımaǵymyzdyń kómir kásiporyndary josparly túrde jumys istep jatyr. Bıylǵy jyly Qaraǵandy oblysynda kómir óndirý kólemi 38 mln tonnany quraıdy dep josparlanýda. Ol ótken jylmen salystyrǵanda 19%-ǵa kóbirek.
Halyqqa arnalǵan kommýnaldyq-turmystyq kómir túsirýdi 1 mln tonnaǵa nemese 24% ulǵaıtý josparlanǵan.
Aımaqta kommýnaldyq-turmystyq kómirdi jetkizetin bes negizgi kompanııa bar: «Shubarkól kómir» AQ, «Sat Komır» TKRK AQ, «Qýshoqy razrezi» JShS, «Molodejnyı razrezi» JShS jáne «Saryarqa-Energy» JShS.
