Qaraǵandy oblysynda jylytý maýsymy bastaldy
QARAǴANDY. QazAqparat - Qaraǵandy oblysynda bıyl jylytý maýsymy ádettegiden erte bastaldy. Birinshi bolyp jylý oblys ortalyǵy jáne seriktes qalalar, sonymen qatar birqatar aýdandarǵa beriledi. Osy aptanyń sońynda oblystyń ońtústiginde ornalasqan aımaqtarda jylý jelileri iske qosyla bastaıdy, dep habarlaıdy QazAqparat tilshisi.
Jylý berý maýsymynyń bastalýy týraly oblystyq TKSh, energetıka jáne kommýnaldyq sharýashylyq basqarmasynyń basshysy Ulantaı Úsenov onlaın rejımde ótken apparattyq keńeste baıandady.
«QR Premer-mınıstriniń orynbasary Eraly Toǵjanovtyń tapsyrmasyna sáıkes, JRVI jáne Covid-19 aýrýlarynyń ósýine jol bermeý maqsatynda jáne temperatýranyń kúrt tómendeýine baılanysty 25 qyrkúıekten bastap Qaraǵandy jáne Shahtınsk qalalarynda jylý berý maýsymy bastaldy. 1 qazanǵa deıin oblys ortalyǵynda barlyq úıler men mekemeler qosylady. 28 qyrkúıekten bastap Temirtaý, Saran, Abaı, Buqar jyraý, Qarqaraly, Nura, Osakarov aýdandarynda jylý beriledi», - dep habarlady ol.
Qazgıdromet boljamyna sáıkes, oblystyń ońtústiginde osy aptada jyly aýa raıy saqtalady – shamamen 18 gradýs nólden joǵary. Balqash, Jezqazǵan, Sátbaev, Qarajal, Prıozersk, Aqtoǵaı, Jańaarqa, Shet jáne Ulytaý aýdandarynda jylytý maýsymy 1-10 qazan aralyǵynda bastalady.
Jylytý maýsymynyń bastalýy shtattyq rejımde ótýde. Kómir men mazýttyń qory jetkilikti. Jergilikti kózderden jylytylatyn áleýmettik nysandar kómirmen qamtamasyz etilgen. Bıýdjettik uıymdardyń otynǵa jalpy qajettiligi 189,2 myń tonna. Búgingi kúni 174 myń tonnadan astam otyn jetkizildi. Bul josparlanǵan kórsetkishtiń 92,3 paıyzy.
