Qaraǵandy oblysynda jylyna 1,2 myń avtobýs qurastyrylatyn bolady

QARAǴANDY. QazAqparat – Qaraǵandy oblysynyń Saran qalasynda «Yutong» jolaýshylar avtobýsyn shyǵaratyn jańa zaýyt ashylady. QazAqparat bul týraly QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap habarlaıdy.

«Burynǵy rezeńke-tehnıkalyq buıymdar zaýytynyń bazasynda jumys isteıtin kásiporyn óz óndirisin bıylǵy jyldyń jeltoqsan aıynda iske qosady. Investıtsııalyq jobany iske asyrý úshin joba operatory «Qaztehna» JShS, «Saryarqa «ÁKK» AQ jáne «Yutong» kompanııasynyń qatysýymen birlesken kásiporyn quryldy. Investıtsııa kólemi 37,7 mln AQSh dollaryn qurady. Zaýyt jylyna shamamen 1200 birlik avtobýs shyǵarýdy josparlap otyr. Bul, birinshi kezeńde-aq tozyǵy jetken qoǵamdyq kólik parkiniń jaǵdaıyn aıtarlyqtaı ózgertýge múmkindik beredi», - delingen habarlamada.

Sarapshylardyń málimetinshe, búgingi tańda elimizdegi 12 myńnan astam avtobýstyń tozyǵy jetken, olardyń 50% astamy múlde eskirgen.

«Yutong» - bul jolaýshy tehnıkasyn jetkizýshi álemdegi iri kompanııalardyń biri. Onyń álemdik naryqtaǵy úlesi – 15%, al Qytaı naryǵyndaǵy úlesi 37% quraıdy. «Yutong» avtobýstarynyń jyldyq satylymy 70 myń birlikke teń, al jańa energetıkalyq avtobýstardyń kórsetkishteri jylyna 25 myń birlik bolady. Sondaı-aq, ındýstrııalyq aımaq aýmaǵynda jobalardy iske qosý otandyq mamandar úshin 600 jańa jumys ornyn (aralas salalardy eskere otyryp) qurýǵa múmkindik beredi», - dep málim etti QR IIDM baspasóz qyzmetinen.

Budan bólek, Saran qalasyndaǵy zaýyt jol-qurylysynda qoldanylatyn kólikter men júk tehnıkasyn shyǵaratyn bolady. Ónim sapasy Qazaqstannyń ónerkásiptik jáne taý-ken óndirýshi kompanııalary arasyndaǵy suranysqa jaýap beredi. Jalpy, jylyna 400 birlik arnaıy tehnıka shyǵarý josparlanǵan. Qaraǵandy zaýyty aldaǵy ýaqyta elimizden bólek, Reseı, Qyrǵyzstan, Iran, Pákistan jáne basqa da elderge ónim eksporttaýdy kózdep otyr.

Qaraǵandy óńiriniń iri ónerkásip oshaǵyna aınalatyn zaýyttyń óndirisin jolǵa qoıýyna «Problemalyq kredıtter qory» AQ úlken septigin tıgizdi. Óıtkeni, Qaraǵandy rezeńke-tehnıkalyq buıymdar zaýyty 2019 jyldyń qyrkúıek aıyna deıin «Problemalyq kredıtter qory» AQ tıesili edi. 2017 jyly bank sektoryn saýyqtyrý baǵdarlamasyn iske asyrý aıasynda ekinshi deńgeıdegi bankterge teńgerimderindegi «jumys istemeıtin» qaryzdardy «tazartý» protsesin júzege asyrý úshin Qor men «BTA Banki» AQ arasynda aktıvterdi satyp alý-satý (satyp alý) sharty jasaldy. Shartqa sáıkes qorǵa Qaraǵandy oblysy, Saran qalasy, rezeńke-tehnıkalyq buıymdar zaýytynyń Soltústik ónerkásiptik aımaǵy (RTI) ornalasqan nysan berilgen.

Al, «Problemalyq kredıtter qory» AQ maqsaty jumys istemeıtin aktıvterdi satyp alý arqyly ekinshi deńgeıdegi bankterdiń kredıttik portfelderiniń sapasyn jaqsartý, sondaı-aq, saýyqtyrý jáne satý arqyly satyp alynǵan aktıvterdi ekonomıkalyq aınalymǵa tartý arqyly ulttyq ekonomıkany saýyqtyrýǵa járdemdesý bolyp tabylady. Sol sebepti, 2019 jyldyń 3 qyrkúıeginde «Problemalyq kredıtter qory» AQ nysandy elektrondy saýda arqyly satylymǵa shyǵardy.

Eske sala keteıik, Qaraǵandy oblysynyń avtobýs parkin 2022 jylǵa deıin 50% jańartý josparlanýda. Bul týraly Jolaýshylar kóligi jáne avtomobıl joldary basqarmasynyń basshysy Askerbek Haltonov Instagram-da tikeleı efırde málimdegen bolatyn.