Qaraǵandy oblysynda jylý jelilerin jańartý boıynsha Jol kartasy qurylady
Qaraǵandy oblysynda El Prezıdentiniń saılaýaldy baǵdarlamasyn oryndaý jónindegi is-qımyl jospary 63 is-sharany qamtıdy. Óńir basshysy Ermaǵanbet Bólekpaev 12 jeltoqsanda Úkimettiń keńeıtilgen otyrysynda Memleket basshysy bergen tapsyrmalardy iske asyrý jáne oryndaý boıynsha keńes ótkizdi. Ár baǵyt boıynsha mindetter belgilengen.
«TKSh salasy búginde barlyq ınfraqurylymnyń álsiz býyny bolyp tabylady. Oblystyń jeti energııa kóziniń negizgi jabdyqtarynyń jaı-kúıi qazandyqtardyń 75%-ǵa, týrbınalardyń 70%-ǵa tozýymen sıpattalady. Qaýipti aımaqtarǵa Temirtaý men Shahtınsk qalalary kirip otyr. Dál osyndaı jaǵdaıdy jylý jelilerinde de kórip otyrmyz. Kommýnaldyq uıymdardyń ınvestıtsııalyq baǵdarlamalary problemalardy sheshpeı jatyr», - dedi Ermaǵanbet Bólekpaev.
Ol TKSh jelileri men tirshilikti qamtamasyz etý nysandarynyń tozýyn azaıtý jáne jańartý boıynsha Jol kartasyn ázirleýdi tapsyrdy. Ár eldi meken boıynsha naqty aqparat bolýy kerek.
Agroónerkásiptik keshende tereń óńdeý ónimderin óndirý boıynsha jobalardy usyný talap etiledi. Bul aımaq turǵyndaryn jergilikti taýarlarmen qamtamasyz etýdi arttyrýǵa kómektesedi. Aýyldyq jerlerde kásipkerlikti qoldaý jalǵasady.
Jalpy, jergilikti taýar óndirýshilerdi qoldaý – basty mindetterdiń biri, dep atap ótti oblys ákimi. Ol árbir ınvestıtsııalyq jobany iske asyrý boıynsha yqtımal táýekelderge taldaý jasaýdy tapsyrdy.
Memleket basshysynyń barlyq tapsyrmalaryn oryndaý boıynsha jol kartasy ázirlenetin bolady.
«Turǵyndar bizden bos sandar men kórsetkishterdi emes, naqty nátıjelerdi kútip otyr. Árbir kórsetkishtiń artynda naqty ister, sapaly jáne merziminde oryndalǵan jobalar bolýy tıis», – dep atap ótti Ermaǵanbet Bólekpaev.
