Qaraǵandy oblysynda jyl sońyna deıin úsh balabaqsha ashylady
Sonymen qatar, erekshe bilim berý qajettiligi bar balalar úshin Qaraǵandy men Abaı aýdanynda toǵyz ınklıýzıvti top ashylady, dep habarlaıdy QazAqparat tilshisi.
Qaraǵandy oblysynyń bilim basqarmasy basshysynyń mindetin atqarýshy Baqytgúl Ádekenova Óńirlik kommýnıkatsııalar qyzmeti platformasynda ótken brıfıngte mektepke deıingi jáne mekteptegi bilim berý júıesindegi jańa nysandar men jańalyqtar týraly baıandady.
1 maýsymnan bastap mektepke deıingi uıymdarǵa balalardy qabyldaý bastaldy. Oqýǵa qabyldaý Indigo24.kz aqparattyq júıesi arqyly júzege asyrylady. Búgingi tańda 5 myńnan astam sábı tirkeldi.
«Jyl sońyna deıin Saran, Qaraǵandy jáne Shet aýdanynda 670 oryndyq taǵy úsh balabaqsha ashýdy josparlap otyrmyz. Erekshe bilim berý qajettiligi bar balalar úshin Qaraǵandy men Abaı aýdanynda toǵyz ınklıýzıvti top ashylady. Mektepterde jańa oqý jylyna daıyndyq boıynsha belsendi jumystar júrgizilýde. Bul eń aldymen 1-shi synypqa qabyldaý. Bıyl biz 21 myńǵa jýyq birinshi synyp oqýshysyn kútemiz. Búgingi kúni oblys boıynsha ata-analardan tek 18 myń ótinish kelip tústi. 1-synypqa qujattardy qabyldaý 1 tamyzda aıaqtalatynyna nazar aýdarǵym keledi», – deıdi Baqytgúl Ádekenova.
Birinshi synypqa qabyldaý úshin qujattardy egov.kz jáne e.bilimal.kz aqparattyq júıesi arqyly berýge bolady. Tamyz aıynda dástúr boıynsha mektepterde «Sábıler mektebi» daıyndyq kýrstarynyń jumysy uıymdastyrylady.
Óńirde mektepterdi oqýlyqtarmen qamtamasyz etý máselesi sheshildi. Olardy satyp alýǵa 2,3 mıllıard teńge bólindi.
«Jalpyǵa mindetti bilim berý» qory esebinen áleýmettik osal otbasylardan shyqqan oqýshylar mektep formasymen jáne keńse jabdyqtarymen qamtamasyz etiledi. Ata-analar mektepterge tıisti qujattardy usynýy kerek.
«Kópbalaly jáne turmysy tómen otbasylardan shyqqan balalardy mektepke daıyndaýǵa kómek kórsetý úshin 1 tamyzdan bastap dástúrli túrde «Mektepke jol» aktsııasy bastalady. Bıyl 143 bilim berý nysanynda, onyń ishinde 32 kúrdeli sıpattaǵy nysandarda jóndeý jumystary júrgizilýde. 1 qyrkúıekte Qaraǵandydaǵy 11a shaǵyn aýdanynyń oqýshylary úshin jańa mektep jumysyn bastaıdy. Temirtaýda 12-shi mektep ǵımaraty jańartylýda, onyń qyzmeti osy oqý jylynda qaıta jańǵyrtylatyn bolady. Jańa oqý jylyna daıyndyq jumystary jalǵasady», – dep qosty spıker.
Sondaı-aq, brıfıngte múmkindik bolǵan jaǵdaıda mektepterde balalar men oqýlyqtardyń jeke zattaryna arnalǵan shkaftar ornatylady.