Qaraǵandy oblysynda jyl sońyna deıin 700 myń adamǵa vaktsına salý josparlanýda
QARAǴANDY. QazAqparat – Qaraǵandy oblysynda koronavırýstyq ınfektsııaǵa qarsy vaktsınatsııa 1 aqpanda bastaldy. Búgingi tańda 700-ge jýyq adam ekpe aldy. Bul medıtsına qyzmetkerleri. Jyl sońyna deıin 700 myńǵa jýyq turǵyndy vaktsınatsııalaý josparlanýda, dep habarlaıdy QazAqparat tilshisi.
Óńirdegi epıdemıologııalyq jaǵdaı jáne vaktsınatsııa naýqany týraly Densaýlyq saqtaý basqarmasynyń basshysy Erjan Nurlybaev Óńirlik kommýnıkatsııalar qyzmeti alańynda tikeleı efırde ótken brıfıngte aıtyp berdi.
«Qaraǵandy oblysy «jasyl aımaqqa« oraldy. Epıdjaǵdaı turaqty dep baǵalanady. Ótken aptada 418 naýqas anyqtaldy, olarda aýrý zerthanalyq dıagnostıkalyq ádispen rastaldy. 21 myń adam testileýden ótti», - dedi spıker.
COVID-19 vaktsınatsııasy úshin oblys boıynsha 115 egý kabıneti ashyldy. Vaktsınany tasymaldaý jáne saqtaý qaýipsizdigi úshin qajetti jabdyqtar satyp alyndy.
Árbir egý kabınetinde beınekameralar ornatylǵan. Olar onlaın rejıminde bolyp jatqannyń bárin taratady.
Basqarma basshysynyń aıtýynsha, vaktsınatsııa kólemi aı saıyn artatyn bolady.
«Bir jyl ishinde oblysymyzdyń 700 myńnan kem emes turǵynyn vaktsınatsııalaý josparlanýda. Qazaqstanda 2021 jyldyń sońyna deıin barlyǵy 6 mln adamdy egý kózdelip otyr. Koronavırýstyq ınfektsııa vaktsınamen tejeletin ınfektsııalarǵa jatady. Vaktsınatsııa - bul barlyq shekteýlerdi alyp tastaýǵa jáne dástúrli ómir saltyna oralýǵa múmkindik beretin jalǵyz ádis», - dedi Erjan Nurlybaev.
Ol vaktsına týraly jalǵan habarlamalar men kúmándi habarlamalarǵa boı aldyrmaýǵa jáne resmı aqparat kózderine senýge shaqyrdy.
Buǵan deıin habarlanǵandaı, Qaraǵandy farmatsevtıkalyq kesheniniń (QBK) bazasynda tehnologııalar transferti boıynsha «Spýtnık V» koronavırýsyna qarsy reseılik vaktsınany shyǵarý týraly sheshim qabyldandy. Tehnıkalyq aýdıt alańnyń daıyndyǵyn rastady.
Yntymaqtastyq týraly kelisimge QR Densaýlyq saqtaý mınıstrligi men Reseıdiń tikeleı ınvestıtsııalar qory (RFPI) qol qoıdy. Keshen bazasynda Reseıden jetkiziletin sýbstantsııadan kezeń-kezeńimen vaktsınalardyń eki mıllıon dozasy óndiriledi dep kózdelip otyr.
QFK kelisimsharttyq óndirýshi retinde áreket etedi. Lıtsenzııalar men noý-haýdyń ıesi - RFPI. Keshen zerthanalarynda jáne vaktsına ázirleýshisi Gamaleıa atyndaǵy Máskeý ǴZI-da sapany eki márte baqylaý kózdelgen.
