Qaraǵandy oblysynda jyl basynan beri gaz ballony jarylysynan 3 adam qaza bolǵan

QARAǴANDY. QazAqparat – Kúndelikti ómirde gaz ballondaryn paıdalaný kezindegi qaýipsizdik sharalary týraly QR TJ mınıstrliginiń ónerkásiptik qaýipsizdik komıteti Qaraǵandy oblysy boıynsha departamenti basshysynyń orynbasary Arman Ábilqasymov aıtyp berdi, dep habarlaıdy QazAqparat tilshisi.

Sońǵy ýaqytta respýblıka boıynsha turmystyq gaz ballondaryn paıdalanýǵa baılanysty jazataıym oqıǵalar jıilep ketti.

Sebeptiń biri – mundaı ballondardy tıisti tekserýsiz satý.

Qaraǵandy oblysy boıynsha qaıǵyly statıstıkany TJD Memlekettik órt baqylaý basqarmasynyń bas mamany Qurmet Jumekenov keltirdi.

Jyl basynan beri turmystyq gaz ballondaryn durys paıdalanbaý saldarynan bolǵan bes órt tirkeldi.

Úsh adam qaza taýyp, segiz adam zardap shekti.

Qaraǵandylyqtardan turmystyq gaz ballondaryn tek gaz toltyrý stantsııalary nemese gaz toltyrý pýnktteri sııaqty mamandandyrylǵan kásiporyndardan satyp alýdy jáne quıýdy suraıdy.

«Búgingi tańda Qaraǵandyda birneshe akkredıttelgen kásiporyndar bar. Turmystyq, kommýnaldyq-turmystyq jáne ónerkásiptik tutynýshylar úshin gaz ballondaryn toltyrýmen jáne satýmen AlemGaz,»Hanter«AGQS,»GorGaz«,»Propan«,» GAZOIL «gaz sharýashylyǵy basqarmasy» aınalysady. Dál osy kásiporyndar turmystyq ballondardy jóndeıdi, boıaıdy jáne synaıdy. «Gaz jáne gazben jabdyqtaý týraly» QR Zańynyń 28-babynyń 1-tarmaǵyna sáıkes turmystyq ballondarǵa suıytylǵan munaı gazyn quıý jáne bólshek saýdada ótkizý turmystyq ballondardyń jaramdy tehnıkalyq jaı-kúıin qamtamasyz etý jónindegi mindet júktelgen gaz toltyrý stantsııalarynda nemese pýnktterde qatań túrde júzege asyrylýǵa tıis», – dedi Arman Ábilqasymov.

Zańdy buzǵan AGQS ákimshilik jaýapkershilikke tartylady.

Turǵyndar da jazalanady. Qaýipsizdik erejelerine sáıkes jáne zańǵa sáıkes eki qabattan joǵary ǵımarattarda gaz ballondaryn paıdalanýǵa jol berilmeıdi. Eger gaz ballony tabylsa, páter ıesine 7 AEK mólsherinde aıyppul salynady, qaıta buzǵany úshin – 10 AEK.

Qaraǵandylyqtar erejeni buzǵan kórshileri týraly qalalyq turǵyn úı ınspektsııasyna 42-11-05 telefony boıynsha nemese TJD-ǵa 112 nómiri boıynsha habarlaı alady.