Qaraǵandy oblysynda jyl basynan beri eki myńnan astam alaıaqtyq faktisi tirkelgen
Oblys prokýrory Qusaıyn Igembaevtyń tóraǵalyǵymen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti. Jumysqa keńes músheleri, qalalar men aýdandardyń prokýrorlary, quqyq qorǵaý, jergilikti atqarýshy organdardyń basshylary qatysty.
«Bıylǵy jyldyń 8 aıynda oblysta 2 myńnan astam alaıaqtyq faktisi tirkeldi, odan kelgen shyǵyn 1,8 mlrd teńgeni qurady. Bul – barlyq qylmystyq quqyq buzýshylyqtardan keltirilgen shyǵynnyń tórtten bir bóligi (23,5%)», - dep habarlady oblys prokýratýrasynda.
«Qarjy pıramıdalaryna qatysty jaǵdaı erekshe nazar aýdarýdy talap etedi. Tek bıylǵy jyly osyndaı 12 fakt anyqtaldy, bul ótken jylmen salystyrǵanda 92%-ǵa kóp. Bul rette jábirlenýshilerdiń sany, ádette, júzdegen bolyp esepteledi. Mysaly, oblystyń Ekonomıkalyq tergeý departamenti kóp deńgeıli marketıng retinde jasyrylǵan qarjy pıramıdasyn qurǵan M.-ǵa qatysty qylmystyq isti tergeýde. Qazirgi ýaqytta 333 jábirlenýshi anyqtaldy, olarǵa 2 mlrd teńge kóleminde shyǵyn keltirilgen», - dep tolyqtyrdy prokýratýra.
Vedomstvoaralyq ózara is-qımyl jáne jedel aqparat almasý maqsatynda alaıaqtyqqa jáne qarjy pıramıdalaryn uıymdastyrýǵa qarsy is-qımyl sharalarynyń 2022-2023 jyldarǵa arnalǵan keshendi josparyn ázirleý sheshildi.
Osy sanattaǵy qylmystyq isterdi sapaly túrde ashý jáne tergeý úshin olardyń quramyna IT salasyndaǵy qyzmetkerlerdi mindetti túrde engize otyryp, mamandandyrylǵan jedel tergeý toptary qurylatyn bolady.
Sondaı-aq jurtshylyqty jáne BAQ-ty halyqpen profılaktıkalyq jumysqa keńinen tartý jónindegi sharalardy jalǵastyrý qajettiligine nazar aýdaryldy.
Sondaı-aq, otyrysta turmystyq zorlyq-zombylyqtyń aldyn alý salasyndaǵy ýákiletti organdardyń ózara is-qımyl máseleleri qaraldy.
«Bıyl 1000-ǵa jýyq áıel men bala turmystyq zorlyq-zombylyq qurbany bolǵan. 18 adam qaıtys bolǵan, 40 adam jaraqat alǵan. Negizgi sebepter – ishimdik ishý, jumyssyzdyq, daǵdarystyq áleýmettik-turmystyq qatynastar», - dep habarlady prokýrorlar.
Shara qorytyndysy boıynsha daǵdarys ortalyqtarynyń jumysyn jandandyrý, ýákiletti qurylymdardyń kelisilgen ózara is-qımylyn qamtamasyz etý, turmystyq zorlyq-zombylyqtyń aldyn alý jáne jolyn kesý boıynsha tıimdi quqyqtyq jáne praktıkalyq sharalardy iske asyrý usynyldy.