Qaraǵandy oblysynda jyl basynan beri 28 mal urlyǵy tirkeldi
QARAǴANDY. QazAqparat – 24 aqpannan bastap, Qaraǵandy oblysy aýmaǵynda «Mal urlyǵy» jedel-izdestirý is-sharasy júrgizilýde. Osy shara aıasynda óńirde 35 bas mal tabylyp, ıelerine qaıtaryldy, dep habarlaıdy QazAqparat tilshisi.
Jyl basynan beri Qaraǵandy oblysynyń aýmaǵynda mal urlyǵynyń 28 faktisi tirkeldi, onyń úsheýi ashyldy.
Mal urlyǵyna baılanysty basty problema jaıylymdyq jerdiń azdyǵymen baılanysty bolyp otyr.
«2019 jyly jasalǵan 285 mal urlyǵynyń 212-si jaıylymdarda bolǵan. Kóp jaǵdaıda ıeleri maldarynyń ne urlanǵanyn, ne joǵaltyp alǵanyn bilmeıdi. Olar aldymen malyn óz betinshe izdeıdi de, polıtsııaǵa ábden úmiti úzilgen soń keledi. Osy sebepti qylmystyń izin sýytpaı ashý qıyndaı túsedi», - deıdi Qaraǵandy oblysy polıtsııa departamentiniń ókilderi.
Olar keltirgen málimetterge qaraǵanda, ótken jyly polıtsııa qyzmetkerleri joǵalyp ketken 540 bas maldy taýyp, ıelerine qaıtarǵan. Polıtsııa kóp jaǵdaıda urlanbaǵan, joǵalyp ketken maldy izdestirýge májbúr. Al bul jumystar kóbine elden shalǵaı aımaqtarda júrgiziletindikten kóp kúsh pen resýrs jumsaýdy qajet etedi.
