Qaraǵandy oblysynda jyl basynan beri 270 myń sharshy metrden astam úı salyndy
QARAǴANDY. QazAqparat – Qaraǵandy oblysynda turǵyn úı qurylysynyń ósýi jalǵasýda. Jeti aıdyń qorytyndysy boıynsha kólem 14,4%-ǵa artty, dep habarlaıdy QazAqparat tilshisi.
Óńirdiń qańtar-shilde aılaryndaǵy áleýmettik-ekonomıkalyq damýynyń aldyn ala nátıjeleri onlaın rejımde ótken apparattyq keńeste talqylandy.
«Ónerkásip ónimderin óndirý 2,3 trln teńge kóleminde kútilýde. Oblystyń negizgi kapıtalyna ınvestıtsııalar 5% ósimmen 408,9 mlrd teńge somasynda boljanýda. Qurylys jumystarynyń kólemi shamamen 195 mlrd teńgeni qurap, 3,2%-ǵa artty. Turǵyn úı boıynsha 271,5 myń sharshy metr nátıje kútilýde, bul 2020 jyldyń sáıkes kezeńine qaraǵanda 14,4%-ǵa artyq», – dep baıandady ekonomıka basqarmasynyń basshysy Azamat Muqanov.
Onyń aıtýynsha, oblysta metallýrgııada ósim baıqalady.
Jedel derekter boıynsha, bolat óndirý 23,6%-ǵa, jazyq ılek óndirý – 20%-ǵa, shoıyn óndirý – 17,4%-ǵa ulǵaıdy.
Іshki taýar aınalymy 3% ósimmen 1,2 trln teńge somasynda kútilýde.
Syrtqy saýdada da oń dınamıka baıqalady. Oblystan taýarlar eksporty 35,5%-ǵa artyp, kólemi 2 578,2 mln AQSh dollaryn qurady.
«Jalpy, jeti aıdyń qorytyndysy boıynsha óńirdiń áleýmettik-ekonomıkalyq damýynyń oń dınamıkasy baıqalady. Turǵyn úı qurylysy boıynsha jaqsy qarqyn kórip otyrmyz. Jyl sońyna deıin turǵyn úı qurylysy kóleminiń tórtten bir bóligine ulǵaıýyn kútemiz jáne kezekte turǵandar aldynda mindettemelerdi oryndaı alamyz. Investıtsııalar tartý boıynsha ósim bar, bul rette kólemniń 80%-dan astamy – bul jeke ınvestıtsııa. Damý qarqynyn tómendetpeý jáne barlyq belgilengen kórsetkishterdi oryndaý qajet», – dedi oblys ákimi Jeńis Qasymbek.
Qaraǵandy oblysynda 2021 jylǵa 6 090 mlrd teńge kólemimen 3,4%-ǵa ekonomıka ósimi josparlanǵan.
