Qaraǵandy oblysynda jýrnalıster marapattaldy
«Búginde jýrnalısterdiń san qyrly eńbegin qajet etpeıtin birde-bir sala joq. Sizder áreket etýge, oılanýǵa, janashyrlyq tanytýǵa, shyndyqty ár túrli turǵydan kórýge kómektesesizder. Qaraǵandy jýrnalıstıka mektebi óziniń erekshe sheberligimen, qaıtalanbas biregeıligimen erekshelenedi. Qaraǵandy – jýrnalıst kadrlarynyń naǵyz ustahanasy dep beker aıtpaıdy», – dedi Jeńis Qasymbek.
Óńir basshysy jýrnalıstıka ardagerleri men jumys istep júrgen BAQ qyzmetkerlerine sheberligi men isine adaldyǵy úshin alǵys aıtty.
«Kópshilikterińiz osy qıyn-qystaý kezeńde jurtshylyqty óńirdegi ahýal týraly jedel ári shynaıy habardar ete otyryp, pandemııamen kúrestiń aldyńǵy qatarynda eńbek etip kelesizder», – dep atap ótti Jeńis Qasymbek.
Kezdesýge qatysýshylarǵa QR Aqparat jáne qoǵamdyq damý mınıstrliginiń marapattary tabys etildi. Belgili qaraǵandylyq jýrnalıst, Karlag zertteýshisi Ekaterına Kýznetsova «Eńbek ardageri» medalimen marapattaldy. Jýrnalıstıka ardageri Saǵat Batyrhanova, «5 arna» redaktory Rýshan Baraev, «TV-ART» kompanııasynyń dırektory Rýslan Nıkonovıch jáne «Indýstrıalnaıa Karaganda» gazeti bas redaktorynyń orynbasary Stanıslav Pesnev «Aqparat salasynyń úzdigi» tósbelgisine ıe boldy. Birqatar BAQ basshylary men qyzmetkerleri mınıstrlik gramotalarymen marapattaldy.
Sondaı-aq, jyl saıynǵy «Altyn suńqar» baıqaýynyń qorytyndysy shyǵarylyp, jeńimpazdardy marapattady. Oblysta ol 15-shi ret óttti. Osy ýaqyt ishinde marapatty 202 jýrnalıst pen alty BAQ ujymy aldy.
Bıyl baıqaýǵa 104 ótinim kelip tústi. Baıqaý komıssııasy on nomınatsııa boıynsha laýreattardy tańdady. Olar 500 myń teńge kóleminde syılyq, dıplomdar men estelik músinsheler aldy.
«Qaraǵandy jýrnalıstıkasynyń damýyna qosqan úlesi úshin» arnaıy syılyǵyna Saryarqa aqparat medıaholdınginiń ujymy ıe boldy. Kompanııa quramyna kiretin jáne bıyl 90 jyldyǵyn atap ótetin oblystyq «Ortalyq Qazaqstan» jáne «Indýstrıalnaıa Karaganda» gazetteri mıllıon teńgeden sertıfıkattar aldy.
«Biz komıssııa músheleri men oblys ákimine jumysymyzdy joǵary baǵalaǵany úshin alǵysymyzdy bildiremiz. Bul bizdiń úlken ujymnyń jeńisi, onyń quramyna tek eki oblystyq gazet – mereıtoı ıeleri ǵana emes, sonymen qatar Life09 jobasy, ınternet-redaktsııa da kiredi. Biz aldaǵy ýaqytta da óńirdiń barlyq basty jańalyqtaryn obektıvti túrde jarııalaýǵa jáne halyqqa paıdaly aqparatty jetkizýge tyrysamyz», – dep atap ótti Saryarqa aqparat medıaholdınginiń dırektory Qambar Ahmet.
