Qaraǵandy oblysynda júrgen «Salamatty Qazaqstan» poıyzynda 51 ota jasaldy
ASTANA. QazAqparat - «Salamatty Qazaqstan» medıtsınalyq poıyzy QR ІІM TJK «Apattar medıtsınasynyń temirjol gospıtaldary» AQ mamandarymen birge Qaraǵandy oblysynyń Qarajal qalasyna jetti, dep habarlaıdy QazAqparat.
Aımaqtyń Tótenshe jaǵdaılar departamentinen málim etkendeı, ústimizdegi jyldyń 12-27 sáýir kúnderi aralyǵynda «Salamatty Qazaqstan» konsýltatıvti-dıagnostıkalyq medıtsınalyq poıyzy Qaraǵandy oblysynyń Terekti, Túıemoınaq, Shubarkól, Qyzyljar beketterinde boldy. Búginge deıin barlyǵy 1952 adam, sonyń ishinde 714 bala tekserildi. Dárigerlerdiń qabyldaýynda 27 064 adam boldy. 17 757 dıagnostıkalyq protserýda júrgizildi (2420 ishki organdardyń ýltradybystyq zertteýi, 1099 bas mıynyń ehoentsefalografııasy jáne ýltradybystyq dopplerografııasy, 1219 elektrokardıografııa, 494 kózdiń ishki qysymyn ólsheý, 1339 rentgenologııalyq zertteý, 317 endoskopııa, 10 869 klınıkalyq-bıohımııalyq analız), 51 kishi emhanalyq ota jasaldy. Mammolog dárigerge 374 áıel qaraldy. Stomatologııalyq kómek 983 turǵynǵa kórsetildi. Qarajal qalasy medıtsınalyq poıyzdyń on úshinshi aıaldamasy bolyp tabylady. Barlyq kabınetter qajetti dıagnostıkalyq quraldarmen jabdyqtalǵan.
