Qaraǵandy oblysynda jumyssyz jastarǵa arnalǵan jańa joba iske qosyldy

QARAǴANDY. QazAqparat – Qaraǵandy oblysynda bıyl 36 myńnan astam adamdy jumyspen qamtý josparlanýda. Jumyssyz jastarǵa kómektesý úshin «birinshi jumys orny» jańa jobasy iske qosyldy, dep habarlaıdy QazAqparat tilshisi.

Ol týraly jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova onlaın rejımde ótken apparattyq keńeste egjeı-tegjeıli aıtyp berdi.

«Birinshi jumys orny» jobasyna JOO men kolledj túlekteri, sondaı-aq 29 jasqa deıingi NEET sanatyndaǵy jastar qatysa alady.

Kásiporyn men jumyspen qamtý ortalyǵy arasyndaǵy shart boıynsha keminde eki jyl merzimge jumys usynylady. Birinshi jyly jergilikti bıýdjet qarajatynan jumys berýshi 20 AEK (58 340 tg.) mólsherinde aı saıynǵy sýbsıdııa alady.

Ásem Júnispekova habarlaǵandaı, jobaǵa birinshi bolyp Saran, Sátbaev, Shahtınsk qalalary jáne Abaı aýdany qosyldy.

Baıandamashynyń aqparaty boıynsha, birinshi toqsanda «Eńbek» baǵdarlamasy boıynsha 8 myńǵa jýyq turǵyn jumysqa ornalasty. Jumyspen qamtýdyń jol kartasy boıynsha 10 myń jumys orny quryldy.

Qoǵamdyq jumystarǵa 2 563 adam ornalasýǵa nıet bildirdi. Jastar tájirıbesine 203 adam jiberildi.

Jumyssyzdar mamandyqty tegin ıgere alady. Kýrstar «1S» býhgalteri, mehanızator, qazandyq qondyrǵylarynyń mashınıst-operatory, manıkıýr sheberi, massaj jasaýshy, pishýshi jáne t. b. mamandyqtar boıynsha júrgiziledi.

«Bastaý bıznes» jobasy boıynsha kásipkerlik negizderine tegin oqytylady. Onlaın rejıminde birinshi lekke arnalǵan kýrstar bastaldy. Bıyl oblysta barlyǵy 1 250 adamdy oqytý josparlanýda. Joba túlekteri úshin shaǵyn nesıeler men granttarǵa qarajat qarastyrylǵan.

Jumyspen qamtý jol kartasy boıynsha bıyl óńirge 22,8 mlrd teńge bólindi. Bilim berý, densaýlyq saqtaý, sport jáne TKSh salasynda 19 ınfraqurylymdyq joba iske asyrylýda.

Oblys ákimi Jeńis Qasymbek jumyspen qamtý boıynsha tapsyrma berdi.

«Biz turǵyndardy jumysqa ornalastyrý boıynsha barlyq mindettemelerdi oryndaýymyz kerek. «Eńbek» jáne «Jumyspen qamtý jol kartasy» baǵdarlamalarynyń iske asyrylýy turaqty baqylaýǵa alynǵan. «Alǵashqy jumys orny» jobasyna barlyq qalalar men aýdandarda qarajat bólý qajet. Múgedek adamdardy jumysqa ornalastyrý boıynsha jumysty jandandyrý talap etiledi», - dep atap ótti óńir basshysy.