Qaraǵandy oblysynda juqpaly aýrý mamandary tapshy
QARAǴANDY. QazAqparat - Qoǵamdyq densaýlyq saqtaý departamentiniń komıssııasy Qaraǵandy oblystyq juqpaly aýrýlar aýrýhanasynda úsh jasar Aızere Qaharmanova men Temirtaý aýrýhanasynyń juqpaly aýrýlar bóliminde kóz jumǵan Aslan Manasovtyń qaıtys bolý jaǵdaıyn tekserý barysynda juqpaly aýrý dárigerleriniń jetispeıtindigin anyqtady, dep habarlaıdy «QazAqparat» HAA.
Qaraǵandy oblystyq densaýlyq saqtaý basqarmasy basshysynyń orynbasary Asqar Horoshash nelikten juqpaly aýrýlar dárigeriniń qyzmetin mamandyǵy basqa adamnyń atqarǵanyn túsindirdi.
«Qaraǵandy oblysyndaǵy aýrýhanada juqpaly aýrý dárigerleri tapshy. Infektsıonıst sertıfıkatyn alý úshin 9 jyl oqý kerek. Ókinishke oraı, jas dárigerler bul mamandyq boıynsha oqyǵylary kelmeıdi, sebebi onyń jumys aýqymy asa úlken. Táýlik boıy demalyssyz jumys isteýge týra keledi. Sondaı-aq, aýrý juqtyrý qateri de bar. Jalaqysy da az», - dedi Asqar Horoshash.
Eske salaıyq, Qaraǵandy oblystyq juqpaly aýrýlar aýrýhanasynda ınfektsıonıst dárigerdiń jetispeýi saldarynan 31 jeltoqsanda Aızere Qaqarmanova qaıtys bolǵanda, balalar dárigeri kezekshilik etken. Onyń «ınfektsıonıst» mamandyǵy boıynsha sertıfıkaty bolmaǵan. Temirtaý ortalyq aýrýhanasynda da birqatar zańbuzýshylyqtar anyqtaldy. Onda bir jarym jasar Aslan Manasov juqpaly aýrýlar bóliminde qaıtys bolǵan edi.
