Qaraǵandy oblysynda júk poıyzynyń 12 vagony relsten shyǵyp ketti
QARAǴANDY. QazAqparat – Qaraǵandy oblysynyń Moıynty stantsııasynyń mańynda júk poıyzynyń 12 vagony relsten shyǵyp ketti. Vagondarǵa bıdaı tıelgen. Mamandar apattyń sebebin anyqtap, bir jolaq boıynsha poıyzdardyń qozǵalysyn qalpyna keltirdi, dep habarlaıdy QazAqparat tilshisi.
1 aqpan kúni saǵat 13:55-te Moıynty – Saryshaǵan ýchaskesinde júk poıyzynyń 12 vagony relsten shyǵyp ketti. Atalmysh sostavqa bıdaı tıelgen bolatyn. Mamandardyń aıtýynsha, joldan shyǵyp ketýine vagondardyń biriniń búıir jaqtaýynyń synýy sebep bolǵan. Apat ornynda Sary-Shaǵan, Shý jáne Balqash stantsııalarynyń qalpyna keltirý poıyzdary jumys istep jatyr.
«BP Jambyl bólimshesiniń Moıynty – Sary-Shaǵan qos joldy ýchaskesiniń Novaly stantsııasynda bir joldan poezdardyń qozǵalysy qalpyna keltirildi. Jóndeý jumystary jalǵasýda», - dep habarlady «Qazaqstan temir joly» ulttyq kompanııasy» AQ baspasóz qyzmeti.
