Qaraǵandy oblysynda joldardy jóndeýge bólinetin qarjy bir jarym esege artady
QARAǴANDY. QazAqparat - Qaraǵandy oblysynda shaǵyn jáne monoqalalardyń joldaryn jóndeýge 2020 jylǵa 6 mıllıard teńgeden astam qarjy bólý josparlanýda.
Osy jylmen salystyrǵanda qarjylandyrý bir jarym esege artady. Jol ınfraqurylymyn jóndeý jumystary qalalar men aýyldarda «Óńirlerdi damytý» baǵdarlamasy sheńberinde ótkizedi.
Oblystyq jolaýshylar kóligi jáne avtomobıl joldary basqarmasynyń basshysy Áskerbek Haltonovtyń aıtýynsha, bıyl oblystyq jáne jergilikti bıýdjetten baǵdarlama boıynsha avtojoldardy damytýǵa 4,1 mlrd teńge bólingen. 100 shaqyrymnan astam jol retke keltirildi. Kelesi jyly 120 shaqyrym kentter ishindegi jáne qala kóshelerinde jóndeý jumystary júrgiziledi. Jol sapasyn jaqsartýǵa «Aýyl - el besigi» baǵdarlamasy da kómektesedi. Bıylǵy jyly Jańaarqa, Aqtoǵaı jáne Ulytaý aýdanynda tórt joba júzege asyryldy. Qosymsha qarajat esebinen 25 shaqyrym jol jóndeldi.
«2020 jyly Aqtoǵaı, Qarqaraly, Osakarov jáne Shet aýdandarynda 15 jobany iske asyrý qarastyrylǵan. Aýyldyq eldi mekenderde 150 shaqyrym avtojol retke keltiriletin bolady», – dedi Áskerbek Haltonov apparattyq keńeste.
«Elbasynyń tapsyrmasyn oryndaý úshin respýblıkalyq bıýdjetten jergilikti mańyzy bar avtojoldardy jóndeýdi qarjylandyrý jalǵasady. Alǵa qoıylyp otyrǵan mindet – 2025 jylǵa qaraı jergilikti mańyzy bar jaǵ,daıy jaqsy avtojoldardyń úlesin 95%-ǵa jetkizý. Óńirlerdi damytý Baǵdarlamasyn iske asyrý oblystyń mono jáne shaǵyn qalalarynyń ınfraqurylymyn jaqsartýǵa múmkindik beredi.
Oblys ákimi Jeńis Qasymbek aldaǵy jobalar úshin qujattardy ýaqytyly daıyndaýdy tapsyrdy.
«Kelesi jyly respýblıkalyq bıýdjetten joldardy jóndeýge kóp qarjy bólinedi. Oblystyq bıýdjetten qarjylandyrý da ulǵaıýda. Biz óz tarapymyzdan bárin naqty pysyqtaýymyz kerek. Joldardyń sapasyn jaqsartý basym baǵyttardyń biri bolyp tabylady», - dep atap ótti aımaq basshysy.
Oblystyń mono jáne shaǵyn qalalaryndaǵy avtojoldardyń jalpy uzyndyǵy 1427 shaqyrymdy quraıdy.
