Qaraǵandy oblysynda jolda qalǵan 81 adam evakýatsııalandy
ASTANA. QazAqparat - Boran, joldyń kórinbeýi, qardyń qalyń jaýýyna baılanysty Qaraǵandy oblysynyń barlyq baǵytynda jol qozǵalysy shekteldi, dep habarlaıdy oblystyq TJD-nyń baspasóz qyzmeti.
Ótken demalys kúnderi TJD qutqarý bólimsheleriniń júrgizgen avarııalyq-qutqarý jumystary barysynda qar qursaýynan 81 adam evakýatsııalanyp, 6 tehnıka shyǵaryldy. Qutqarý operatsııalaryna 6 tehnıka men jeke quramnyń 15 qyzmetkeri jumyldyryldy.
Shet aýdanynyń «Almaty-Ekaterınbor» tas jolynyń 904 shaqyrymynda «Astana-Saryaǵash» baǵytynda shyqqan «Mersedes» avtokóligi tehnıkalyq aqaýyna baılanysty toqtap qalǵan. Qutqarýshylardyń kúshimen Aqsý-Aıýly kentine 59 adam, onyń ishinde 6 bala evakýatsııalandy.
Buqar jyraý aýdanynyń Baımyrza aýylynan 10 shaqyrym qashyqtyqta qutqarýshylar kúshimen isten shyqqan KamAZ júk kóliginen 2 adam Temirtaý qalasyna jetkizildi.
Buqar jyraý aýdanynyń «Qaraǵandy-Temirtaý-Chkalov-Bereznıakı» jolynyń 19 shaqyrymynda isten shyqqan VAZ jeńil kóliginen 1 adam Temirtaý qalasyna evakýatsııalandy.
Taǵy bir jaǵdaı Buqar jyraý aýdanynyń «Almaty-Ekaterınbo» tas jolynyń 1 074 shyqyrymynda isten shyqqan «Scania» avtokóliginen 1 adam jol boıyndaǵy kempıngke evakýatsııalandy.
Osylaı, Shet aýdanynyń 926 shaqyrymynda «Almaty-Ekaterınbor» tas jolynda qutqarýshylar isten shyqqan MAN avtokóliginen 2 adam Aqsý aýylyna evakýatsııalady.
Shet aýdanynyń Aqsý-Aıýly kentinen 35 shaqyrymynda «Shymkent-Astana» baǵytynda jolǵa shyqqan «Mersedes» jolaýshylar avtobýsy toqtap qaldy. Qutqarýshylardyń kúshimen Aqsý-Aıýly kentine 16 adam evakýatsııalandy.
Qutqarýshylar aýa-raıynyń buzylýy jaǵdaıynda ýaqytsha alys jerlerge shyǵýdy shekteýdi, sonymen qatar avtokóliktiń tehnıkalyq jaramdylyǵyn tekserý, daýyldy eskertýler men aýa-raıyn qarap otyrýǵa eskertedi.
