Qaraǵandy oblysynda jolda qalǵan 111 adam qutqaryldy
QARAǴANDY. QazAqparat - Qaraǵandy oblysynyń Tótenshe jaǵdaılar departamenti qyzmetkerleriniń kúshimen ótken táýlikte qar qursaýynan 111 adam qutqaryldy, onyń ishinde 2 bala boldy. Qutqarý jumystary barysynda qalyń qarǵa maltyqqan 28 avtokólik jolǵa shyǵaryldy, dep habarlaıdy QazAqparat tilshisi.
Qutqarý jumystary Qaraǵandy, Temirtaý qalalarynda jáne Buqar jyraý, Abaı, Osakarov jáne Ulytaý aýdandarynda júrgizildi.
Buqar Jyraý aýdanynda 23 qańtarda tańerteń «Qurylys aýyly - Úshtóbe aýyly» avtojolynyń 12-shi shaqyrymynda qar qursaýynan 20 jeńil avtokólik shyǵaryldy, onda 40 adam bolǵan.
«Qaraǵandy-Aıagóz-Buǵaz» avtojolynyń 43-shi shaqyrymynda turyp qalǵan úsh avtokóliktegi 5 adam Botaqara kentine jetkizildi.
24 qańtarda saǵat 02:15-te «Almaty-Ekaterınbýrg» tas jolynyń 1046-shy shaqyrymynda qarǵa maltyqqan 7 jeńil avtokólikten 13 adam qutqaryldy, olar Qaraǵandy qalasyna jetkizildi.
Qaraǵandyda saǵat 20:25-te Shahterskıı yqshamaýdanynda qutqarýshylar qar qursaýynan 5 avtokólikti alyp shyqty.
Sonymen qatar qutqarýshylar borandy kúni jolǵa jaıaý shyqqan adamdarǵa kómektesti. Abaı aýdanynda «Qaraǵandy-Shahtınsk-Qoıbas» avtojolynyń 7-shi shaqyrymynda Sárepti aýylyna jaıaý bara jatqan eki adamdy qutqarýshylar jol boıyndaǵy kempıngke deıin jetkizdi. Ekinshi jaǵdaıda «Aqtaý kenti-Temirtaý qalasy» avtojolynyń 14-shi shaqyrymynan Temirtaý qalasyna jaıaý bara jatqan eki er adamǵa kómektesti.
Qolaısyz aýa raıy medıtsınalyq qyzmetterdiń jumysyna da kedergi keltirgen. Jedel járdem brıgadalary qalyń qardan óte almaı, shaqyrtýlar túsken mekenjaılarǵa bara almady. Qaraǵandy qalasynda jáne Ǵ. Mustafın kentinde shuǵyl túrde aýrýhanaǵa jatqyzýdy qajet etetin jeti adamdy qutqarýshylar jedel járdem kólikterine deıin jetkizdi.
Sonymen qatar, Abaı qalasynda qutqarýshylar jedel járdem kóligin qar qursaýynan shyǵardy.
Búgin túnde saǵat 02:30-da qutqarýshylar jedel aýrýhanaǵa jatqyzýdy qajet etetin áıeldi Osakarov aýdany Batpaqty aýylynan Osakarovka aýylynyń ortalyq aýrýhanasyna jetkizdi.
Qaraǵandy oblysynyń TJD aýa raıynyń nasharlaýyna baılanysty alys jolǵa shyǵýdan jáne qashyq jolǵa jaıaý attanýdan bas tartýdy usynady.
