Qaraǵandy oblysynda jolaýshylar avtobýsy órtenip ketti
QARAǴANDY. QazAqparat - Qaraǵandy-Jezqazǵan trassasynda jolaýshylar avtobýsynyń túgi qalmaı janyp ketti, dep habarlaıdy QazAqparat.
«№3 avtoparki» JShS-ne qarasty «Yutong» avtobýsy 20 maýsym kúni 16-00-der kezinde №170 «Qaraǵandy-Jáırem» baǵytymen ketip bara jatqan. Kólikte 49 jolaýshy bolǵan.
Belgisiz sebepterge baılanysty Aqoı aýylynyń mańynda kóliktiń qozǵaltqyshy órtene bastaǵan. Jolaýshylardyń órtti sóndirmek bolǵan áreketterinen eshteńe shyqpady. Órt jolaýshylar salonyn da qaýlaı bastaǵan. Budan soń jolaýshylardyń júksalǵyshtan zattaryn alyp, qaýipsiz jerge baryp turǵannan basqa esh amaly qalmaǵan.
«Mert bolǵan nemese zardap shekkender joq. Biz órt týraly habardy estigen soń birden qosalqy avtobýs jiberdik»,-dedi «№3 avtoparki» JShS dıspetcherlik qyzmeti.
Avtobýstyń nelikten órtengendigin Órtke qarsy kúre jáne apattan qutqarý qyzmetiniń ókilderi anyqtaýda.
