Qaraǵandy oblysynda jolaýshylar avtobýsy men júk kóligi soqtyǵysty
ASTANA. QazAqparat - Qaraǵandy oblysynda jolaýshylar avtobýsy men júk kóligi soqtyǵysty. Bul jaıynda QR ІІM Tótenshe jaǵdaılar komıtetiniń resmı ókili Nursultan Nurahmetov aıtty, dep habarlaıdy QazAqparat tilshisi.
«21 qarasha kúni tańerteńgi saǵat 8-de Qaraǵandy oblysynyń Buqar jyraý aýdanynda, «Qyzylorda-Pavlodar» avtojolynyń 982 shaqyrymynda «Qýshoqy aýyly-Qaraǵandy» baǵytynda qatynaıtyn, ishinde 45 adamy bar jolaýshylar avtobýsy men júk kóligi soqtyǵysty», - dedi ol.
Onyń aıtýynsha, Qaraǵandy oblystyq TJD jedel qutqarý qyzmeti men apattyq medıtsına ortalyǵynyń qyzmetkerleri jol apaty saldarynan avtobýstyń ishinde qysylyp qalǵan 2 jolaýshyny qutqarǵan.
«Apat ornynda 1990 jyly dúnıege kelgen bir jolaýshy qaza taýyp, 9 adam, onyń ishinde bir bala túrli dene jaraqatymen Qaraǵandynyń №1 qalalyq aýrýhanasyna jetkizildi», - dedi Nursultan Nurahmetov.
