Qaraǵandy oblysynda jol apatynan úsh adam qaza tapty

QARAǴANDY. QazAqparat - Qaraǵandy oblysynyń Aqtoǵaı aýdanynda jeńil kólik júrgizýshisi jóndelip jatqan jol ýchaskesine shyǵyp ketip, júk kóligimen soqtyǵysqan. Nátıjesinde úsh adam qaza tapty, dep habarlaıdy QazAqparat tilshisi.

Jazataıym oqıǵa 12 tamyzda saǵat 02:00 shamasynda Qaraǵandy oblysynyń Aqtoǵaı aýdanynda «Balqash-Gúlshat» avtojolynda boldy.

«Subaru jeńil kóliginiń 65 jastaǵy júrgizýshisi eskertý belgileriniń bolýyna qaramastan, qaıta qalpyna keltirý jumystary júrgizilip jatqan jabyq jolǵa shyǵyp ketip, 47 jastaǵy er adamnyń basqarýyndaǵy Shacman júkkóligimen soqtyǵysty. Bul ýaqytta júk kóligi joldyń osy bóligine jóndeý jumystaryn júrgizip jatqan.

Kólik apaty saldarynan «Subaru» júrgizýshisi men onyń eki jolaýshysy alǵan jaraqattarynan oqıǵa ornynda kóz jumdy», - dep habarlady Qaraǵandy oblysy PD baspasóz qyzmeti.

Atalǵan fakti boıynsha QR QK 345-baby 4-bóligine saı sotqa deıingi tergeý bastaldy. Tıisti saraptamalar taǵaıyndaldy. Tergeý júrgizilýde.

Qaraǵandy oblysynyń tártip saqshylary júrgizýshilerden jol qozǵalysy erejelerin qatań saqtaýdy jáne jyldamdyq rejımin asyrmaýdy suraıdy.