Qaraǵandy oblysynda jol apatynan bútin bir otbasy kóz jumdy

NUR-SULTAN. QazAqparat – Qaraǵandy oblysynda bútin bir otbasy – erli-zaıypty men olardyń úsh balasy kóz jumdy. Bir bala aýrýhanada jatyr, dep habarlaıdy QazAqparat.

«26 tamyz kúni saǵat 23:00 shamasynda «Balqash-Prıozersk» avtojolynda Gúlshat kentinen 23 shaqyrym jerde Prıozersk qalasy baǵytyna qaraı kele jatqan «Opel Vektra» avtokóligin tizgindegen 35 jastaǵy júrgizýshi jóndeý júrip jatqan jabyq jolǵa shyǵyp ketip, 25 jastaǵy júrgizýshi basqarǵan «Hovo» avtokóligimen soqtyǵysqan.

Jol apaty saldarynan júrgizýshi men onyń 30 jastaǵy jolaýshysy (áıeli), olardyń kámelet jasyna tolmaǵan úsh balasy oqıǵa ornynda kóz jumdy. Bir bala medıtsınalyq mekemege jetkizildi», - dep atap ótti Qaraǵandy oblysy PD jergilikti polıtsııa qyzmeti basqarmasynyń bastyǵy Qýanysh Zárýbaev.

Bul fakti polıtsııada tirkeldi. Tıisti saraptamalar taǵaıyndaldy. Olardyń nátıjeleri boıynsha protsessýaldy sheshim qabyldanady.