Qaraǵandy oblysynda jol apatynan bir adam mert boldy
QARAǴANDY. QazAqparat - Qaraǵandy oblysy Temirtaý qalasynyń mańynda eki jeńil kólik soqtyǵysyp, saldarynan bir adam qaza tapty. Taǵy bir adam aýrýhanaǵa jetkizildi, dep habarlaıdy QazAqparat tilshisi.
19 aqpan kúni Temirtaý qalasynan 3 shaqyrym qashyqtyqta Astana qalasyna baǵyt alyp bara jatqan «Aýdı 100» avtomobıliniń 39 jastaǵy júrgizýshisi ózge «Aýdı 80» kóligimen soqtyǵysqan. Saldarynan «Aýdı 80» avtokóliginiń jolaýshysy oqıǵa ornynda kóz jumdy, kóliktiń júrgizýshisi ártúrli dene jaraqattarymen aýrýhanaǵa jetkizildi.
Aldyn ala boljam boıynsha, «Aýdı 100» avtokóliginiń júrgizýshisi jyldamdyqty shekten tys asyrǵan.
«Temirtaý-Astana» tasjolynda bolǵan jol-kólik oqıǵasy boıynsha Qazaqstan Respýblıkasy Qylmystyq Kodeksiniń 345 baby 3 tarmaǵyna sáıkes sotqa deıingi tergeý bastaldy. Qazirgi ýaqytta tıisti saraptamalar taǵaıyndalyp, tergeý amaldary júrgizilýde.
