Qaraǵandy oblysynda jol apatynan bir adam qaza taýyp, taǵy bir adam jaraqat aldy
QARAǴANDY. QazAqparat – Ótken táýlikte Qaraǵandy oblysynyń aýmaǵynda úsh jol-kólik oqıǵasy tirkeldi. Jol apaty saldarynan bir adam qaza taýyp, bir adam jaraqat aldy, dep habarlaıdy QazAqparat tilshisi.
24 aqpanda Osakarov aýdanynda Nur-Sultan – Qaraǵandy avtojolynda DAFTE 105xf avtokóliginiń 50 jastaǵy júrgizýshisi Qaraǵandy baǵytyna bara jatyp, joldyń nashar kórinýi saldarynan rýldi basqara almaı, qarsy kele jatqan Nura aýdanynyń 23 jastaǵy turǵyny tizgindegen Ravon Nexia R3 mashınasymen soqtyǵysty.
«Apat saldarynan 34 jastaǵy Ravon Nexia R3 jolaýshysy oqıǵa ornynda kóz jumdy. QR QK 345-baby 3-bóligi «Abaısyzda adam ólimine ákep soqqan jol qozǵalysy erejelerin buzý« boıynsha qylmystyq is qozǵaldy», - dep habarlady Qaraǵandy oblysy PD baspasóz qyzmeti.
Sol kúni Temirtaýda 32 jastaǵy VAZ-2114 júrgizýshisi Respýblıka dańǵylynda, rettelmeıtin jaıaý júrginshiler ótkelinde 36 jastaǵy áıeldi qaǵyp ketti. Zardap shegýshi túrli jaraqattarmen medıtsınalyq mekemege jatqyzyldy. QR QK-niń 345-baby 1-bóligi «Abaısyzda adam densaýlyǵyna aýyrlyǵy ortasha zııan keltirýge ákep soqqan jol qozǵalysy erejelerin buzý» boıynsha qylmystyq is qozǵaldy.
Eki derek boıynsha da tergeý júrgizilýde.
Polıtseıler aýa raıynyń kúrt nasharlaýyna baılanysty kólik quraldarynyń júrgizýshileri qozǵalys kezinde barynsha muqııat jáne saq bolýy, jyldamdyq rejımin, qaýipsiz qashyqtyqty jáne manevr jasaý erejelerin múltiksiz saqtaýy tıis ekenin eskertedi. Jaıaý júrginshilerge de qyraǵy bolǵan jón.
Sonymen qatar, tártip saqshylary oblys turǵyndaryna uzaq saparlardan bas tartýdy jáne aýa-raıy men joldardyń jaı-kúıi týraly habarlamalardy baqylaýdy usynady.
Jolda qıyn jaǵdaıǵa tap bolǵan azamattar kez kelgen ýaqytta polıtsııaǵa «102» nómiri boıynsha habarlasa alady.
