Qaraǵandy oblysynda jol apatynan 4 adam mert boldy
QARAǴANDY. QazAqparat - Búgin Osakarov aýdanynyń Trýdovoe aýylynyń mańynda eki jeńil kólik soqtyǵysyp, bir júrgizýshi men úsh jolaýshy kóz jumdy, dep habarlaıdy QazAqparat tilshisi.
5-shi aqpan Trýdovoe aýylynan 5 shaqyrym jerde «Qaraǵandy-Molodejnyı» tasjolynda 40 jasar «Huynday Tucson» avtokóliginiń júrgizýshisi kóliktiń basqara almaı, joldyń qarsy baǵytyna shyǵyp ketip, «Lada» avtokóligimen soqtyǵysqan.
Jol kólik oqıǵasynyń saldarynan «Lada» avtokóliginiń 45 jastaǵy júrgizýshisi men onyń úsh jolaýshysy alǵan jaraqattarynan oqıǵa orynynda qaza boldy. «Huynday Tucson» avtokóliginiń júrgizýshisine medıtsınalyq kómek kórsetildi.
Qazirgi ýaqytta tıisti saraptamalar taǵaıyndalyp, tergeý amaldary júrgizilýde.
«Qaraǵandy oblysynyń Osakarov aýdanynda bolǵan jol-kólik oqıǵasy boıynsha Qazaqstan Respýblıkasy Qylmystyq Kodeksiniń 345 baby, 4 tarmaǵyna sáıkes sotqa deıingi tergeý bastaldy», - dep málimdedi Qaraǵandy oblysynyń PD baspasóz qyzmeti.
