Qaraǵandy oblysynda jedel járdem jańa júıe boıynsha jumys isteıtin bolady
QARAǴANDY. QazAqparat – Qaraǵandy oblystyq jedel járdem stansasyndaǵy feldsherlerge 100 planshet satyp alyndy. Bul quraldar qoldanystaǵy ADAJ júıesine (avtomattandyrylǵan dıspetcherlik aqparattyq júıe) biriktirilgen. Atalmysh gadjetter, mamandardyń aıtýynsha, shuǵyl shaqyrtýlarǵa jetý ýaqytyn 30%-ǵa qysqartýǵa kómektesedi, dep habarlaıdy QazAqparat tilshisi.
Pılottyq jobaǵa Qaraǵandy, Jezqazǵan, Sátpaev jáne Balqash qalalary qatysady. Planshettermen jumys júrgizýdi óńirde bir aı buryn synaqtan ótkize bastady. Osy ýaqyt aralyǵynda jedel járdem brıgadasynyń jumysy shynymen de jyldamdaı bastaǵan.
«Biz ýaqytty aıtarlyqtaı únemdeımiz. Dıspetcher júıege shaqyrtýdy engizedi, ol atalmysh mekenjaıǵa qaı brıgada jaqyn turǵanyn ózi anyqtaıdy. Dárigerdiń planshetine barlyq qajetti aqparattar túsedi, ol tipti dıspetchermen bolǵan aýdıohabarlamany da tyńdaı alady», - deıdi oblystyq jedel medıtsınalyq járdem stansasynyń dırektory Zúlfıkar Ábilqasymov.
Shaqyrtý kartasy da budan bylaı elektrondyq formatta rásimdeledi. Oǵan dáriger naýqasqa bergen dári-dármekter men jasalǵan manıpýlıatsııalary týraly aqparatty engizedi. Eger naýqasty aýrýhanaǵa jatqyzý qajet bolsa, onda bul málimetter emdeý mekemesi naýqasty qabyldaýǵa daıyn bolý úshin qajetti aýrýhananyń qabyldaý bólimine jiberiledi.
Planshetter oblystyń iri qalalarynda paıdalanylady, sebebi avtomattandyrylǵan júıeniń tolyqqandy jumys isteýi úshin turaqty ınternet qajet. Biraq bolashaqta joba aýdandar men aýyldyq okrýgterde de júzege asyrylady dep josparlanýda.
Jedel medıtsınalyq járdem stansasyndaǵy taǵy bir jańalyq - reanımobılderdiń túsi. Stantsııa dırektory Zúlfıkar Ábilqasymovtyń aıtýynsha, arnaıy avtokólikter halyqaralyq standarttarǵa sáıkes ashyq-sary túske boıalǵan.
«Álemdik tájirıbe kórsetkendeı, arnaıy avtokólikter joldarda ashyq-sary túste bolsa, kózge birden túsedi. Bizdiń júrgizýshilerimiz olarǵa jıi jol bere bastaǵanyn baıqaımyz. Bul, árıne, jumys sapasyn jaqsartady jáne jetý ýaqytyn tezdetedi», - dedi jedel járdem stantsııasynyń jetekshisi.
Densaýlyq saqtaý mınıstriniń tapsyrmasy boıynsha oblysymyzdaǵy jedel medıtsınalyq járdem stantsııasy avtoparkiniń arnaıy mashınalarynyń 90%-ǵa jýyǵy qaıta boıaldy.
Qaraǵandy oblysynda 130 jedel medıtsınalyq járdem brıgadasy jumys isteıdi. Onyń 8-i Jezqazǵanda, 7-i Sátpaev qalasynda, 7-i Balqashta, 13-i Temirtaýda. Sonymen qatar árbir aýdanda bir-birden jedel járdem brıgadalary qyzmet etedi.
Jyl saıyn oblysta dárigerler 600 myńnan astam shaqyrýlarǵa shyǵady. Aı saıyn óńirdiń 60 000 turǵynyna jedel medıtsınalyq kómek kórsetiledi. Kún saıyn dıspetcherlik pýltke 170-ten astam qońyraý kelip túsedi. Qońyraýlar 4 sanat boıynsha bólinedi.
JMK brıgadasynyń patsıenttiń turǵan jerine kelgen ýaqyty JMK dıspetcherinen shaqyrtý alǵan sátten bastap:
1 sanat jedeldilik-10 mınýtqa deıin;
2 jedeldilik sanaty-on bes mınýtqa deıin;
3 jedeldilik sanaty-otyz mınýtqa deıin;
4 jedeldilik sanaty-alpys mınýtqa deıin.
