Qaraǵandy oblysynda jedel járdem mashınasy men 80-ge jýyq adam qutqaryldy

Qaraǵandy oblysynyń aýmaǵynda aýa raıynyń qolaısyzdyǵy týraly sms-eskertpege qaramastan  (burqasyn men jol kórinisiniń nasharlaýy), kóptegen kólik júrgizýshileri alys jolǵa shyqqan.

«4 aqpan kúni tańerteńnen 5 aqpan kúni túnge deıin Temirtaý-Aqmola oblysynyń shekarasy, Topar-Jezqazǵan, Qaraǵandy-Balqash, Qaraǵandy-Qarqaraly, Qaraǵandy-Pavlodar oblysynyń shekarasy, Kıevka aýyly- Aqmola oblysynyń shekarasyna deıingi tas joldar barlyq kólik túrleri úshin jabyq tur.  Alaıda, jekelegen azamattar aýa raıynyń qolaısyzdyǵyna qaramastan jolǵa shyǵyp, qar qursaýynda qaldy», - dep habarlandy Qaraǵandy oblystyq TJ departamentiniń baspasóz qyzmetinde.

 

«TJ basqarmasy men órt sóndirý qyzmeti, apattyq-qutqarý qyzmetiniń arqasynda Temirtaý mańynda 20 adam evakýatsııalandy. Qarqaralydan 3 shaqyrym qashyqtyqtaǵy tas jolda qarda qalyp qoıǵan jedel járdem mashınasy men avtobýstan 13 adam qutqaryldy. Búrkitti aýylynyń mańynda qar qursaýynan shyǵa almaǵan jeti avtomobılden 10 adam evakýatsııalandy», - dep habarlaıdy TJ departamentiniń baspasóz qyzmeti.

Qutqarýshylar Jańaarqa aýdanyndaǵy Qyzylorda-Pavlodar tas jolynda buzylǵan «VAZ» avtomobılinde úsik shalýǵa az qalǵan eki adamdy tapqan. Buqar jyraý aýdanynyń Chkalovo aýylyna jaqyn mańda 10 mashına qar qursaýynda qalyp, 13 adam qutqaryldy.

«Oǵan qosa, naýqas balany jedel jetkizý oqıǵasy oryn aldy. Jedel-qutqarý jasaǵy 2008 jyly dúnıege kelgen balany Buqar jyraý aýdanynyń Rostovka aýylynan «TREKOL» jol talǵamaıtyn mashınasymen Temirtaý ortalyq aýrýhanasyna jetkizdi. Ol jedel medıtsınalyq kómekke zárý bolǵan», dep málim etti TJ departamentiniń baspasóz qyzmeti.

 

Qutarýshylar jergilikti polıtsııa qyzmetiniń bólimshesimen,  QR Ulttyq gvardııasynyń «Ortalyq» óńirlik qolbasshylyǵyndaǵy №52859 áskerı bólimimen birge qar qursaýynan 73 adamdy evakýatsııalap, 6 azamatty qutqardy.