Qaraǵandy oblysynda jaz aılarynda 12 adam sýǵa batyp ketken
QARAǴANDY. QazAqparat – Qaraǵandy oblysynyń Tótenshe jaǵdaılar departamenti sýǵa shomylý maýsymyn qorytyndylady. Jaz mezgilinde qutqarý bólimsheleriniń jumysy kúsheıtilgen túrde uıymdastyryldy, dep habarlaıdy QazAqparat tilshisi.
Úgit-profılaktıkalyq is-sharalar sýǵa shomylý bastalǵanǵa deıin júrgizilgen. Turǵyndar áńgime júrgizilip, dárister ótkizilip, sýdaǵy qaýipsizdik sharalary týraly jadynamalar taratyldy. Barlyǵy 34 000-ǵa jýyq úgit-nasıhat materıaldary tapsyryldy. Sý aıdyndarynda 350-den astam tyıym salý belgileri, kórneki stendter men bannerler ornatyldy.
Ózen-sýlardyń jaǵasynda demalýshylarmen profılaktıkalyq jumystarǵa erekshe nazar aýdaryldy. Shomylý maýsymy boıy TJD bólimsheleri jergilikti atqarýshy organdarmen, polıtsııamen jáne eriktilermen birlesip sý aıdyndary men jaǵajaılarda jappaı demalý oryndarynda 1200-den astam profılaktıkalyq reıdter jáne 30200 patrýldeý júrgizdi.
Birlesken reıdter júrgizý barysynda jabdyqtalmaǵan jerlerde shomylýdyń, jaǵajaılarda, sý aıdyndarynda jappaı demalý oryndarynda spırttik ishimdikter ishýdiń jolyn kesý, sýdaǵy júris-turys erejelerin túsindirý jumystary júrgizildi.
Polıtsııa qyzmetkerlerimen birge 220 ákimshilik quqyq buzýshylyq anyqtaldy. 162 adamǵa aıyppul salynyp, 58 adamǵa eskertý berildi.
«Halyqpen júrgizilgen aýqymdy aldyn alý jumystarynyń arqasynda sýdaǵy qaıǵyly oqıǵalardyń sany azaıdy Tótenshe jaǵdaılar departamentiniń qutqarýshylary 18 adamdy qutqardy. Qaraǵandy oblysynyń sý aıdyndarynda 1 maýsym men 1 qyrkúıek aralyǵynda barlyǵy 12 adam sýǵa ketti, onyń 4-ýi bala. 2019 jyldyń uqsas kezeńinde oblystyń sý aıdyndarynda 14 adam sýǵa ketken edi, onyń 2-ýi bala», - dep málimdedi Qaraǵandy oblystyq TJD baspasóz qyzmeti.
Sýdaǵy tótenshe jaǵdaılardyń negizgi sebepteri azamattardyń qutqarýshylar baqylamaıtyn sý aıdyndarynda uıymdastyrǵan demalysy, mas kúıde shomylý, sýdaǵy qaýipsizdik erejelerin bilmeý nemese saqtamaý, júze almaý jáne balalardy eresekterdiń qaraýynsyz sýǵa qaldyrý bolyp tabylady.
