Qaraǵandy oblysynda jaıylym tapshylyǵy máselesi qalaı sheshilýde
QARAǴANDY. QazAqparat – Qaraǵandy oblysynyń prokýratýrasy óńirdiń jaıylymdyq alqaptarynyń elektrondyq ınteraktıvti kartasyn ázirledi. Bul ár aýyldaǵy, tipti kishkentaı eldi meken úshin naqty ýaqyttaǵy jaǵdaıdy kórýge múmkindik beredi, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbektiń qatysýymen ótken úılestirý keńesiniń otyrysynda aýyl turǵyndarynyń jeke aýlalarynyń jaıylymdyq jerlerge qoljetimdiligi jáne olardy paıdalaný tıimdiligin arttyrý máseleleri onlaın rejıminde talqylandy.
Qaraǵandy oblysy aýmaǵy jaǵynan elimizdegi eń iri óńir jáne 35 mln gektar jaıylymdyq jeri bar. Bul rette mal jaıýǵa oryn tapshylyǵy 3,6 mln ga quraıdy.
Prokýratýra jaıylymdyq jerlerdiń jetispeýshiligi sebepteriniń biri maldy túgendeý kezinde ony durys eseptemeý dep ataıdy. Mal halyqqa tirkelgen, biraq is júzinde sharýa qojalyqtaryna tıesili. Máseleni sheshý úshin turǵyndardaǵy mal basyn jáne eldi mekenderdiń ishindegi sharýa qojalyqtaryn tolyq tekserý qajet.
«Sondaı-aq, jaıylymdyq jerlerdiń tapshylyǵyn qysqartý úshin paıdalanylmaıtyn jer ýchaskelerin anyqtaý jáne qaıtaryp alý máselesi pysyqtalýda. Búgingi kúni jalpy aýdany 962 myń gektar bolatyn 650 jer ýchaskesi ornatyldy. Qabyldanǵan sharalarmen memleketke 66 ýchaske qaıtaryldy, 289 ýchaske aınalymǵa tartyldy», - dep habarlady Qaraǵandy oblysynyń prokýratýrasynda.
