Qaraǵandy oblysynda «jasyl» energetıkanyń qýaty 230 megavattqa jetti
QARAǴANDY. QazAqparat – Óńirde tórt kún elektr stantsııasy jumys isteıdi jáne jańa nysandar salý josparlanǵan. Bul sektordy damytý týraly energetıka jáne TKSh basqarmasynyń basshysy Ulantaı Úsenov onlaın rejımdegi apparattyq keńeste aıtyp berdi, dep habarlaıdy QazAqparat tilshisi.
«Qazirgi ýaqytta Qaraǵandy oblysynda jalpy qýaty 200 MVt bolatyn tórt kún elektr stantsııasy jumys isteıdi. Jobalar Saran, Aqtoǵaı aýdanynyń Gúlshat kentinde, Shet aýdanynyń Aǵadyr aýylynda, Jezqazǵanda jáne Keńgir kentinde iske qosyldy. Sonymen qatar, Abaı jáne Buqar jyraý aýdandarynda eki bıogaz stantsııasy jáne Yntymaq sý qoımasynda shaǵyn sý elektr stantsııasy jumys isteıdi. Oblys boıynsha jańartylatyn jáne balamaly energetıkanyń jalpy qýaty - 227,97 MVt», - dep habarlady baıandamashy.
Bul jobalardy júzege asyrýǵa 102 mlrd teńge ınvestıtsııalanǵan.
Basqarma basshysynyń aıtýynsha, sheteldik jáne otandyq ınvestorlar «jasyl» energetıkany damytýǵa múddeli. Jańartylatyn energııa kózderi qýatyn arttyrý josparda bar.
Balqashta, «Qońyrat» shaǵyn aýdanynyń mańynda qýaty 100 MVt kún elektr stantsııasy salynýda. Nysandy bıyl iske qosý josparlanyp otyr.
Saran qalasynda cheh ınvestorlary jańa nysan - qýaty 100 MVt jáne odan joǵary jınaqtaýyshtary bar gıbrıdti kún elektr stantsııasyn salýdy josparlap otyr.
Jobany júzege asyrý úshin 18 ga jer telimi bólindi.
Keńgir stansasynyń qýatyn arttyrý josparlanýda.
Otandyq ınvestor Aqtoǵaı aýdanynda, Torańǵalyq aýylynyń mańynda jel elektr stantsııasyn jáne Jezqazǵanda bıoelektr stantsııasyn salýǵa nıetti.
«Biz JEK qýatynyń aıtarlyqtaı ósimin kórip otyrmyz. 2020 jyly óndiris 2019 jylmen salystyrǵanda 77%-ǵa ósti. Bizde birinshi kezekte kún energetıkasy boıynsha úlken áleýet bar. Jańa jobalardy qoldaýǵa daıynbyz. Olardy júzege asyrý ınvestıtsııa men jańa jumys oryndaryn ashady», - dep atap ótti oblys ákimi Jeńis Qasymbek.
